Fələstinin HƏMAS hərəkatının yaraqlıları İsrail həbsxanalarında məhbus olan fələstinlilərin mərhələli şəkildə azad edilməsinə razılaşıblar...
Poliqon xəbər verir ki, bu barədə Al Hadath telekanalı məlumat yayıb. Qeyd edək ki, yaraqlılar Qəzza zolağından girovların azad edilməsinə dair razılaşmaya yalnız bütün fələstinlilərin eyni vaxtda İsrail həbsxanalarından azad ediləcəyi təqdirdə razılaşacaqlarını bildirmişdilər.
Al Hadath telekanalının məlumatında qeyd olunur ki, Parisdə bu yaxınlarda keçirilən görüşdə girovların mübadiləsi üçün yeni şərtlər işlənib. HƏMAS yaraqlıları bəyan ediblər ki, onlar uzun müddətə azadlıqdan məhrum edilmiş şəxslərin azadlığa buraxılmasını tələb etməyəcəklər.
Al Hadath qeyd edir ki, yaraqlılar Parisdə hazırlanmış təkliflərə hələ tam razılıqla cavab verməyiblər.
Yanvarın ABŞ Mərkəzi Kəşfiyyat İdarəsinin (MKİ) direktoru Uilyam Börns Parisdə Misir, İsrail və Qətər nümayəndələri ilə görüşüb. NBC televiziyasının məlumatına görə, görüş iştirakçıları İsrail və HƏMAS arasında girovların mərhələli şəkildə mübadiləsini nəzərdə tutan yeni sazişlə bağlı razılığa gəliblər.
Yanvarın 23-də Axios mənbələrə istinadən yazıb ki, İsrail HƏMAS-a aşağıdakı sxemi təklif edib: yaraqlılar Qəzzada saxlanılan bütün israilli girovları qaytarır (130 nəfər) və buna cavab olaraq israillilər fələstinliləri həbsxanalardan azad edir. Nəşrin yazdığına görə, İsrail “qeyri-müəyyən sayda” fələstinlini həbsxanalarından azad etməyə hazırdır, lakin eyni zamanda 6 min fələstinli məhbusun hamısının azadlığa buraxılmasına razı olmayacağını açıqlayıb.
Poliqon.info