Zurabişvili Avropa İttifaqını Gürcüstanı “tərk etməməyə” çağırıb

Gürcüstan prezidenti Salome Zurabişvili hakim “Gürcü arzusu” partiyasının dövlət başçısına impiçment elan etmək cəhdinə baxmayaraq, Aİ-ni ölkəni tərk etməməyə və Rusiyanın “bu regionda öz təsirini gücləndirməsinə” imkan verməməyə çağırıb...

Poliqon xəbər verir ki, bu barədə “RİA Novosti” Agentliyinin məlumatında bildirilir.

Qeyd edək ki, avqustun sonunda Salome Zurabişvili Avropa İttifaqı ölkələrinin liderləri ilə görüş keçirib. Avropa səfəri üçün prezident Gürcüstan parlamentindən qabaqcadan icazə almayıb ki, bu da Gürcüstan konstitusiyasının pozulması kimi dəyərləndirilib.

Gürcüstan Konstitusiya Məhkəməsinə ölkə prezidentinin impiçmenti üçün ərizəni hakim “Gürcü arzusu” partiyasının sədri İrakli Kobaxidze də daxil olmaqla 80 parlament üzvü təqdim edib. Nəticədə Gürcüstan Konstitusiya Məhkəməsi dövlət başçısının qanunu pozduğunu tanıyıb. Məhkəmənin qərarı parlament tərəfindən təsdiqlənməlidir və bu halda prezident vəzifəsindən kənarlaşdırılmış hesab olunacaq.

Parlamentdə çıxış edən Salome Zurabişvili “bu çətin zamanda” avropalı tərəfdaşlara müraciət etmək istədiyini bildirib.

“Mən onları bu anti-Avropa impiçmentinə baxmayaraq, Gürcüstanı tərk etməməyə çağırmaq istərdim. Rusiyaya yumşaq güc, dolayı işğal və ya Qara dənizin sabitliyini pozmaqla bu regionda təsirini artırmasına imkan verilməməlidir”, deyə Zurabişvili parlamentdə çıxışında bildirib.

Prezident həmçinin vəd edib ki, o, planını başa çatdıracaq və ilin sonuna qədər Gürcüstanın Aİ üzvlüyünə namizəd statusu almasına kömək edəcək.

Poliqon.info