Avropa İttifaqı və ABŞ Ukraynada prezident seçkiləri keçiriləcəyi təqdirdə, hazırkı prezident Volodimir Zelenskinin namizədliyini dəstəkləyəcək...
Poliqon xəbər verir ki, bu barədə “İzvestiya” qəzetinə Avropa Parlamentinin deputatlarına istinadən məlumat yayıb.
Fransa parlamentinin deputatı Tyerri Marianinin sözlərinə görə, Avropa İttifaqının başqa bir namizədi dəstəkləməsini onun üçün təsəvvür etmək çətindir.
Almaniya parlamentinin deputatı Qunnar Bek bildirib ki, birlik çoxdan hazırkı prezidentin xeyrinə seçim edib.
“Avropa İttifaqı üçün Ukrayna Zelenskidir, Zelenski isə Ukraynadır”, deyən deputat əlavə edib ki, Qərb Ukraynanı bölünmüş siyasi liderliyə malik bölünmüş millət kimi təqdim etməkdə maraqlı deyil.
Avropa Parlamentinin Xorvatiyadan olan üzvü İvan Vilibor Sinçiç Ukraynada prezident seçkilərinin keçirilməsi ilə bağlı yekun qərarın ABŞ-da veriləcəyini deyib.
Qeyd edək ki, Ukraynada növbəti prezident seçkiləri 2024-cü ildə keçirilməlidir. Ölkənin xalq deputatı Yaroslav Jeleznyak bəyan edib ki, Ukraynanın 2024-cü il büdcəsi layihəsində seçkilərlə bağlı xərclər nəzərdə tutulmayıb.
Hazırda Ukraynada hərbi vəziyyətə görə seçkilər keçirilmir. Ukraynada hərbi vəziyyətin müddəti bir neçə dəfə uzadılıb.
Xatırladaq ki, Zelenski 20 may 2019-cu ildə prezident seçilib. O, Petro Poroşenkodan sonra bu postu tutub.
Poliqon.info