Qərb universitetinin üzbəüzündə Şərq hərəmxanası - Murad Adıgözəlzadənin "yaradıcılığı"

Qərb universitetinin üzbəüzündə Şərq hərəmxanası - Murad Adıgözəlzadənin
Sabir necə deyirdi: “Bu çərxi-fələk tərsinə dövran edir indi”.

İndi şairin daş heykəlinin qulaqları eşitsəydi, yenə də həmin misraları bizə hayqıracaqdı. Ancaq biz eşitməyəcəkdik. Çünki filarmoniyanın həyətindki “Uffo” restoranından gələn bayağı musiqi imkan verməyəcəkdi. Ona görə də qoca Sabir heç yerindən durmasa da, çərxı-fələyin indi də tərsinə dövran etdiyini bilir.

Belə anlaşılır ki, filarmoniyanın direktoru Murad Adıgözəlzadənin musiqi sevgisi çoxdan pul hərisliyinə çevrilib. Pul hərisliyi isə mənası “musiqi dinlənilən yer” demək olan filarmoniyanın bağını striptiz bara döndərib. İndi özünü elitadan sayanlar xalqın qulaq asdığı Üzeyir Mehdizadəyə lağ edir, ancaq əlinə imkan düşən kimi filarmoniyanın həyətini ərəb turistlərinin eyş-işrət yerinə çevirir.

Axşam tərəfləri yolu ordan keçənlər bilir: “Qubernator” parkının ən uzaq guşəsində də sakit bir yer tapmaq mümkün deyil. Musiqi səsi adamın qulağını deşir. Murad Adıgözəlzadənin babası, “Uzaq sahillərdə” romanının müəllifi İmran Qasımov sağ olsaydı Xəzərin yaxın sahillərindəki bu yerdən qaçardı.

Bütün bu xoşagəlməz vaqiələr Prezident Adminstrasiyasının yüz metrliyində baş verir. Bir tərəfi də Qərb universitetidir. Qərb universiteti ilə üzbəüz Şərq hərəmxanası. Paradoksal mənzərədir.

Bu yaxınlarda görkəmli türk pianoçusu Fazil Say Bakıda konsert verdi. O təkcə görkəmli pianoçu və bəstəkar deyil. Eyni zamanda ictimai fikir lideridir. Tez-tez bayağı musiqilər haqqında danışır, xalqının musiqi zövqünü qoruyur. Bizim musiqiçi isə dövlətin filarmoniyasını alverə çevirib. Sabah qoluna qandal vurulanda Avropada deyəcəklər ki, məşhur pianoçunu qandalladılar. Onlara başa salan olmayacaq ki, bu virtouz yox, odiozdur, ərəbcə desək, yaradıcı şəxs deyil, yarıtmaz şəxsdir.

Ətrafda yaşayanlar o qulaqbatıran, ürəkbulandıran musiqiyə dözməyə məcburdur. Ancaq mətbuat yazandan sonra nazir tabeliyindəki qurumun belə hoqqa çıxardığını eşidir, sonra da restorana deyir ki, işində ol. O boyda gurultudan sonra restoran yenidən açılır.

Yeri gəlmişkən, həmin o ajiotaj doğuran görüntülər Murad Adıgözəlzadənin sənətçi xanımı Aysel Teymurzadənin ad günündə olub. 33 yaşını qeyd edən musiqiçi xanım və həyat yoldaşı məclisi bu məkana salıb.

E.Hüseynov (Musavat.com)

pia.az