Həkim: "Aleksey Navalnının vəziyyəti sabitləşib"

Rusiyalı bloger Aleksey Navalnının vəziyyəti sabitləşib.

APA-nın Rusiya bürosunun xəbərinə görə, bunu Omsk xəstəxanasının həkimi bildirib.

Onun sözlərinə görə, A. Navalnının vəziyyətini sabitləşdirməyə nail olublar.

“Bu, ehtiyatlı proqnoz əlamətidir”, - deyə həkim vurğulayıb.

Qeyd edək ki, Rusiyada fəaliyyət göstərən Korrupsiya ilə Mübarizə Fondunun (KMF) qurucusu, müxalifət lideri Aleksey Navalnı Tomskdan Moskvaya təyyarə ilə uçuş zamanı özünü pis hiss edib, təyyarə Omska təcili eniş edib. Müxalifət lideri huşsuz vəziyyətdə toksiki zəhərlənmə ilə xəstəxananın reanimasiya şöbəsinə yerləşdirilib. Daha sonra A. Navalnının komaya düşdüyü və süni nəfəs aparatına qoşulduğu bildirilib.

***

Bu gün səhər zəhərlənmə şübhəsi ilə Rusiyanın Omsk şəhərində xəstəxanaya yerləşdirilən bloger Aleksey Navalnı komadadır.

PİA.az-ın məlumatına görə, bu barədə onun mətbuat katibi Kira Yarmış “Twitter” hesabında yazıb.

“Aleksey süni tənəffüs aparatına qoşulu vəziyyətdədir, komadadır, vəziyyəti ağırdır. Analizin nəticələri hələlik yoxdur”, - deyə o qeyd edib.

Omsk Xəstəxanasının baş həkimi də TASS-a açıqlamasında A. Navalnının ağır vəziyyətdə olduğunu, süni tənəffüs aparatına qoşulduğunu bildirib.

pia.az