XİN: İşğal olunmuş ərazilərlə bağlı qanuna ehtiyac yoxdur

Bunu açıqlamasında XİN-nin mətbuat xidmətinin rəhbəri Hikmət Hacıyev deyib.

Qeyd edək ki, artıq neçə illərdir ki, bir çox millət vəkilləri tərəfindən Azərbaycanın işğal olunmuş ərazilərinə qanunsuz səfərlərin, separatçı-terrorçu rejimlə işbirliklərinin qarşısının alınması ilə bağlı ayrıca qanunun qəbul edilməsi təklifləri səsləndirilir.

Hətta bir müddət öncə parlamentin Hüquq siyasəti və dövlət quruculuğu komitəsi və komitənin keçmiş sədr müavini (hazırda “Qaçqınkom”un sədri - red.) Rövşən Rzayev tərəfindən müvafiq qanun layihəsinin hazırlandığı bildirilirdi.

R. Rzayev özü də bunu təkzib etməmişdi. Qeyd edək ki, separatizmdən əziyyət çəkən bir çox dövlətlərdə, o cümlədən, qonşu Gürcüstanda belə qanun mövcuddur.

Bu məsələ ilə bağlı fikirlərini açıqlayan XİN rəsmisi bildirib ki, burada hər bir dövlətin təcrübəsi fərqli ola bilər.

“Biz bu məsələ ilə bağlı digər dövlətlərin təcrübəsi ilə tanışıq. Bir sıra ölkələrdə işğal olunmuş ərazilərlə bağlı ayrıca qanunlar mövcuddur. Amma Azərbaycanın öz təcrübəsində, Azərbaycanın öz reallığında məsələlərə baxsaq, görərik ki, mövcud qanunvericilik bazası işğal olunmuş ərazilərimizdəki fəaliyyətləri, xüsusilə, qeyri-qanuni fəaliyyətləri tənzimləmək üçün zəruri hüquqi çərçivə yaradır.

Ona görə, bəlkə də, işğal olunmuş ərazilərlə bağlı ayrıca qanunun qəbul edilməsi ilə əlaqədar xüsusi bir zərurət yaranmayıb. Təbii ki, dediyim kimi, bu proses nəzərdən keçirilir, digər ölkələrin təcrübəsinə baxılır.

Amma məsələyə Azərbaycanın mövcud qanunvericiliyi kontekstindən baxsaq, görərik ki, ölkəmizin işğal olunmuş ərazilərdəki fəaliyyətləri, xüsusən, qeyri-qanuni fəaliyyətləri tənzimləyən kifayət qədər mexanizmlər və müddəalar var.

Götürək işğal olunmuş ərazilərimizə qanunsuz səfərləri...

Bunlar Azərbaycan Respublikasının ərazi btüövlüyünün, suverenliyinin, Miqrasiya Məcəlləsinin, pasport rejimi, ölkəyə giriş-çıxışla bağlı məsələləri tənzimləyən və digər qanunların kobud şəkildə pozulmasıdır.

Yaxud, götürək işğal olunmuş ərazilərimizdə iqtisadi fəaliyyətlərin aparılması...

Bu, Azərbaycanda sahibkarlıq fəaliyyətini, o cümlədən, vergi ödəmələri ilə əlaqədar məsələləri tənzimləyən qanunlarımızın aşkar pozulmasıdır. Bu baxmdan, kifayət qədər qanunvericilik bazası var.

Azərbaycan olaraq əsas diqqət yetirdiyimiz məsələ odur ki, münaqişənin həllində irəliləyiş olsun, işğal faktı aradan qaldırılsın. Əsas diqqət bu məsələyə yönəlib”, - deyə XİN rəsmisi əlavə edib.Oxu.Az

pia.az