ABŞ-da Respublikaçı keçmiş vitse-prezident Mayk Pens 2024-cü ildə ölkədə keçiriləcək prezident seçkilərində namizədliyini rəsmən açıqlayıb...
Poliqon xəbər verir ki, Pens bu barədə Twitter-də amerikalılara videomüraciətində bildirib.
“Uzaq qalmaq asan olardı, amma mən belə tərbiyə olunmamışam. Ona görə də bu gün Allah və ailəmin qarşısında Birləşmiş Ştatların prezidentliyinə namizədliyimi irəli sürəcəyimi elan edirəm”, deyə Pens bildirib.
O, videomüraciətində ABŞ-ın hazırkı rəhbərliyinin “Amerika arzusunu” məhv etdiyini vurğulayır. Problemlər arasında o, inflyasiyanın artması, tənəzzül, maaşların kəsilməsi, sərhədlərdə miqrantlarla bağlı problemləri qeyd edir. Pens həmçinin qeyd edib ki, “azadlığın düşmənləri bütün dünyada yürüş edir” və bu zaman Rusiya prezidenti Vladimir Putin və Çin prezidenti Si Szinpinin çıxışlarının görüntüləri görünür.
Mayk Pens ABŞ-ın 45-ci prezidenti Donald Trampın administrasiyasında vitse-prezident olub. O, 2020-ci ildə ABŞ-ın hazırkı prezidenti Co Baydenin qazandığı seçkinin nəticələrinə etiraz edib.
ABŞ-da prezident seçkiləri 2024-cü ilin noyabrına təyin edilib. Respublikaçılar Partiyasından prezidentliyə namizədlik uğrunda 14 nəfərin mübarizə aparacağı gözlənilir. Donald Tramp, Florida qubernatoru Ron DeSantis, Cənubi Karolina senatoru Tim Skott, iş adamı Vivek Ramasvami, Arkanzas qubernatoru Asa Hatçinson, ABŞ-ın BMT-dəki keçmiş səfiri Nikki Heyli və radio aparıcısı Larri Elder yarışda iştirak edəcəklərini açıqlayıblar. Respublikaçılarda əsas namizəd Donald Trampdır.
Poliqon.info