Kiyevə gecə zərbələri – Bir nəfər ölüb...

Mayın 30-na keçən gecə Ukrayna “Şahed-136/131” pilotsuz təyyarələrinin növbəti hücumuna məruz qalıb. Ukrayna Silahlı Qüvvələrinin Hərbi Hava Qüvvələri Komandanlığı ümumilikdə 31 kamikadze pilotsuz təyyarənin hədəfə buraxıldığını bildirib.

Poliqon xəbər verir ki, Ukrayba komandanlığının məlumatına görə, hava hücumundan müdafiə qüvvələri Kiyev səmasında 29 pilotsuz uçan aparatı vurmağa nail olub.

Kiyev şəhər hərbi administrasiyasından bildiriblər ki, bu, son 24 saat ərzində şəhərə üçüncü hücumdur. İlkin məlumatlara görə, hücum bir neçə istiqamətdən dalğalar şəklində həyata keçirilib. Pilotsuz təyyarələrin dağıntıları nəticəsində şəhərin müxtəlif yerlərində binalara ziyan dəyib.

Qoloseyevski rayonunda vurulan dronunun hissələrinin çoxmərtəbəli binaya düşməsi səbəbindən yanğın başlayıb. İlkin məlumata görə, bir nəfər ölüb, üç nəfər yaralanıb. 20 nəfər təxliyə edilib.

“Mərtəbələr arasındakı tavanlar dağıdılıb, xilasetmə işləri aparılır”, deyə şəhər administrasiyasının teleqram kanalında deyilir.

Kiyevin meri Vitali Kliçkonun sözlərinə görə, Darnitski rayonunda dron hissələrinin düşməsi nəticəsində iki fərdi yaşayış evi yanıb. Peçerski rayonunda 3 avtomobil yanıb. Podolski rayonunda yaşayış binasında baş verən yanğın barədə də məlumat verilir. Kliçkonun sözlərinə görə, gecə hücumu nəticəsində 4 nəfər xəstəxanaya yerləşdirilib.

Poliqon.info