HƏMAS Türkiyənin Qəzza zolağı ilə bağlı mövqeyindən narazıdır

Poliqon xəbər verir ki, bu barədə Amerikanın nüfuzlu “Al-Monitor” saytı məlumat yayıb. Sayt yazır ki, oktyabrın 7-də, İsrailin cənubunun islamçı yaraqlılar tərəfindən işğalı günü İstanbulda olan HƏMAS-ın Siyasi Bürosunun rəhbəri İsmayıl Haniyə nəzakətlə ölkədən çıxarılıb. Qeyd olunur ki, buna səbəb təşkilat yaraqlılarının mülki israilliləri öldürməsindən sonra Türkiyənin HƏMAS-ı müdafiə etməyə istəkli olmaması olub.

Nəşr vurğulayır ki, Ankara çətin ki, HƏMAS-a qarşı mövqeyini Qərb tərəfdaşlarının istədiyi qədər sərtləşdirsin. Ərdoğanın göstərişi ilə Türkiyə kəşfiyyatının və Xarici İşlər Nazirliyinin nümayəndələri HƏMAS ilə əlaqə yaratsalar da, ehtimal olunur ki, vasitəçilik təkliflərinə müsbət cavab ala bilməyiblər.

Fələstin mənbəsinin sözlərinə görə, Amerika səlahiyyətliləri HƏMAS-la əlaqələri kəsmək üçün Ankaraya təzyiq göstərir.

Türkiyə hökumətinə yaxın mənbə “Al-Monitor”a bildirib ki, HƏMAS-la təmaslar əsasən Qətərə keçib, Misir ənənəvi rolunu qoruyub saxlasa da, Türkiyə İran və Livanla təmaslarda daha fəal olub.

Bildirilir ki, Ankara “Hizbullah”ın yeni cəbhə açma riskinin qarşısını almağa çalışır.

Poliqon.info