Ermənistan MDB toplantısında iştirak etməyəcək - Sülhdən qaçış yoxsa, Rusiyadan kənarlaşmaq?..

Politoloq: “Ermənistanın MDB ilə bağlı tədbirlərdən yayılmasının Azərbaycanla heç bir əlaqəsi yoxdur”.

“İndi də Ermənistan MDB Birliyini baykot etməyə başlayıb”.

Bu sözləri politoloq Qabil Hüseynli Ermənistanın MDB Xarici İşlər Nazirləri Şurasında iştirak etməməsini Poliqon-a şərh edərkən qeyd edib.

Ermənistan Xarici İşlər Nazirliyinin rəsmi nümayəndəsi Ani Badalyan açıqlayıb ki, Ermənistanın XİN başçısı Ararat Mirzoyan Bişkekdə keçiriləcək MDB Xarici İşlər Nazirləri Şurasının toplantısına qatılmayacaq. Bildiyimiz kimi bundan əvvəl Rusiya XİN başçısının müavini Mixail Qaluzin Bişkekdə Azərbaycan və Ermənistan XİN başçıları arasında görüşün keçirilə biləcəyini açıqlamışdı.

Ermənistanın Rusiya və MDB ilə bağlı bütün tədbirlərdən yayınmasını hansı anlama gəlir? İrəvan Azərbaycanla sülh müqaviləsindən qaçır, yoxsa, Rusiyadan kənarlaşmaq siyasəti yürüdür?

Ermənistanın Rusiyaya qarşı atdığı addımları Poliqon-un əməkdaşı politoloq Qabil Hüseynli ilə müzakirə edib.

Qabil Hüseynli: “Görünən odur ki, Ermənistan Rusiya ilə bütün körpüləri yandıra-yandıra gedir”.

Ermənistanın atdığı bütün bu addımların açıq-aşkar Rusiyaya mesaj olduğunu düşünən politoloq Poliqon-a açıqlamasında qeyd edib ki, Rusiya Ermənistanın bu mesajlarını düzgün başa düşməlidir:

“Ermənistanın MDB ilə bağlı tədbirlərdən yayılmasının Azərbaycanla heç bir əlaqəsi yoxdur. Görünən odur ki, Ermənistan Rusiya ilə bütün körpüləri yandıra-yandıra gedir. Yerəvan Moskva ilə əlaqələri tamamilə qırmaq, sıradan çıxarmaq istəyir. Ermənistan indiyənə qədər Kollektiv Təhlükəsizlik Müqaviləsi Təşkilatını, Avrasiya Birliyini baykot edib.

İndi də Ermənistan MDB Birliyini baykot etməyə başlayıb. Yerəvan Bişkekdə keçiriləcək MDB Xarici İşlər Nazirləri Şurasının toplantısında iştirak etməyəcək. Ermənistanın atdığı bütün bu addımlar açıq-aşkar Rusiyaya mesajdır. Rusiya Ermənistanın bu mesajlarını düzgün başa düşməlidir”.

Nərminə UMUDLU
Poliqon.info