***
Qadın boşluğudu qollarımın sonu,
bütün fəsillərin sevilməyən tərəfindəyəm...
Gecələr rəngsizliyi geyinmək yorur,
gündüzləri isə
qara buludları göstərib,
çətirləri ovutmaq ağrısı...
...rəssam sevdiyi rəngi axtarır ölüncə,
Tanrı sevdiyi bəndəsini,
Adam Allahdan öncəsini.
...nə azan səsindən,
nə kilsə zəngindən
açın qapıları,
gedirəm bir qadın nəfəsindən.
İndi hər şey çılpaqdı,
bircə adam adama bürünür.
...qolların qırılsın göy üzü,
Tanrı da bu qədər sürünərmiş.
Bağışla, məni hamilə qəbir,
qolumda can verən Vətən imiş!
***
...kəpənəklərin azadlığını
öpüb oxşadıqca ağaclar,
çöhrəsi bulanır kor pəncərələrin...
...qadın ayaqlarından qovur qaranlığı
zalım ata rəsmlərinə,
payızdan qalan yağmur gözlərə.
Ən böyük sevgilər
ən böyük xəyanətlərdə yaşayırmış, sən demə!
Gözün arxada qalmasın payız,
ovcumda daşıyıram
yanmış taleyimin külünü...
Nə geriyə dönməyə gecəm,
nə də güzgülərdə təbəssümüm qalıb!..
Gözünüzə su alın adamlar,
işıq da dolu gözlərə yağır, sabah da!
Eldar İsmayıloğlu
Poliqon.info
Digərxəbərlər
Populyar xəbərlər
