Türkiyə prezidenti Rəcəb Tayyib Ərdoğan yəqin ki, dünyada Rusiya lideri Vladimir Putini Qara Dəniz Taxıl Təşəbbüsünə qayıtmağa razı sala biləcək yeganə şəxsdir...
Poliqon xəbər verir ki, bunu Ukrayna xarici işlər naziri Dmitri Kuleba Reuters Agentliyinə müsahibəsində bildirib.
“Düşünürəm ki, prezident Ərdoğanın dünyada Putini Qara dəniz Taxıl Təşəbbüsünə qayıtmağa razı sala biləcək yeganə şəxs olduğunu söyləsəm, mübaliğə olmaz", deyə XİN başçısı bildirib.
Qeyd olunur ki, Rusiyanın ötən ay Ukrayna taxılının Qara dəniz limanlarını tərk etməsinə imkan verən “taxıl müqaviləsi”ni uzatmaqdan imtina etməsi Afrikaya da ağır zərbə vurub. Ukrayna Xarici İşlər Nazirliyinin rəhbəri müharibə başlayandan bəri Afrika qitəsinə artıq üç səfər edib.
Onun sözlərinə görə, Ukraynanın Afrikadakı hədəflərinə təhsil, tikinti və rəqəmsallaşma kimi sahələrdə əməkdaşlıq daxildir: “Rusiyadan fərqli olaraq, biz Afrikaya həm onlar, həm də bizim üçün faydalı olacaq sərmayə qoymaq istəyirik və Rusiyanın Afrikaya ən böyük sərmayəsi “Vaqner”dir. Bu isə Afrika təhlükəsinə sərmayədir”.
Digər məsələlərlə yanaşı, o, avqustun 5-6-da Ukrayna prezidentinin Sülh Formulasına əsaslanan sülhün əsas prinsipləri ilə bağlı milli təhlükəsizlik müşavirləri və siyasi direktorlar səviyyəsində ikinci görüşün keçirildiyi Ciddə görüşünün vacibliyindən danışıb:
“Biz bu prosesin dinamikasından tamamilə razıyıq. Hesab edirəm ki, Ciddədəki görüş bir irəliləyiş oldu, çünki biz ilk dəfə təkcə Avropa və Şimali Amerikanı deyil, bütün dünyanı təmsil edən ölkələri bir araya gətirdik”.
Poliqon.info