Borrell və Abdullahian İrana qarşı sanksiyaların ləğvini müzakirə ediblər

PİA.az xəbər verir ki, bu barədə dekabrın 21-də IRNA məlumat yayıb.

IRNA bildirir ki, İran sanksiyalarının ləğvi və nüvə sazişinin bərpası məsələlərini İranın xarici işlər naziri Hüseyn Əmir Abdullahian və Avropa İttifaqının xarici işlər naziri Cozep Borrell, onun müavini Enrike Mora müzakirə ediblər.

İranın xarici işlər naziri görüş barədə İraqla bağlı konfransda iştirak etdiyi Əmmana səfərinin sonunda jurnalistlərə verdiyi brifinq zamanı məlumat verib. O, Bildirib ki, konfrans çərçivəsində Aİ nümayəndələri ilə görüş baş tutub.

Abdullahian deyib ki, Borrell və Mora ilə iki saatlıq görüşü olub. Görüş zamanı iranlı diplomat nüvə sazişinin bərpası ilə bağlı “Amerika tərəfinin ikiüzlü bəyanatlarını” pisləyib. İranlı diplomat vurğulayıb ki, Amerika Birləşmiş Ştatlarının atdığı addımlar danışıqlar masasında diplomatların dediyi sözlərlə üst-üstə düşmür.

Əmir Abdullahian vurğulayıb ki, ABŞ dəfələrlə nüvə sazişinə geri dönməklə bağlı bəyanat versə də, əslində sazişə qayıtmaqdan yayınır və müxtəlif üsullarla sazişin bərpasını əngəlləyir.

İranlın xarici işlər naziri qeyd edib ki, Tehran sazişin bütün tərəflərinin problemə real baxışa qayıtmasına ümid edir. Əgər Qərb İranın qırmızı xətlərini izləsə, Tehran sazişin bərpası istiqamətində son addımları atmağa hazırdır.

Xatırladaq ki, ABŞ və Qərb ölkələri Vaşinqtonun 2018-ci ildə İranla nüvə sazişindən çıxmasından sonra İrana qarşı sanksiyalar tətbiq etməyə başlayıb.

2021-ci ilin aprel ayından etibarən Vyanada İranın nüvə proqramına dair Birgə Hərtərəfli Fəaliyyət Planının (JCPOA) bərpası üçün danışıqlar aparılır. Müqavilə 2015-ci ildə İran, Fransa, Böyük Britaniya, Almaniya, Çin, Rusiya və ABŞ arasında bağlanıb. Tehran Qərbin sanksiyalarının ləğvi müqabilində nüvə proqramını məhdudlaşdıracağına söz verib.

2018-ci ildə ABŞ prezidenti Donald Tramp birtərəfli qaydada ölkəsinin JCPOA-dan çıxması ilə bağlı qərar verib və İrana qarşı yeni sanksiyalar tətbiq edib. Öz növbəsində Tehran sazişi ləğv edilmiş hesab edib və nüvə proqramının inkişafına yenidən start verib. Co Bayden Ağ Evə gəldikdən sonra ABŞ Vyanada JCPOA-nın bərpası ilə bağlı aylarla davam edən uğursuz danışıqlar aparıb, lakin hələ ki, ümumi razılığa gəlinməyib.

Qeyd edək ki, dünən yayılan bir videoda ABŞ prezideti İranla nüvə sazişini “ölü” adlandırıb.

pia.az