"Getdikçə daha da çox qazanırıq, öyrənirik”.
Bunu "Əli və Nino” dükanları şəbəkəsinin rəhbəri Nigar Köçərli deyib. Onun sözlərinə görə, bu uzun yolda qazandıqları itirdiklərindən çox olub:
""Əli və Nino”nun bu gün 15 yaşı tamam olur. Bayramımızdır. 15 il öncə Fəvvarələr meydanında olan ilk dükanımızı açdıq. Uzun bir yoldur. Hesab edirəm ki, çox maraqlı bir yoldur. Biz oxucularımıza heç vaxt müştəri gözü ilə baxmamışıq. Açığı, artıq 15 ili başa vurçağımız bizə də qəribə gəldi. Bu illər ərzində çox şey qazandıq. Deməzdim ki, nəyisə itirdik, əksinə qazandıqlarımız itirdiklərimizdən çox oldu. Getdikçə daha da çox qazanırıq, öyrənirik. Çalışırıq ki, daha da mükəmməl olaq".
Nigar Köçərli "Əli və Nino”nun keçirdiyi Milli Kitab Mükafatı müsabiqəsinin qaldığı yerdən davam edəcəyini də qeyd edib:
"MKM Azərbaycan ədəbiyyatında ilk böyük layihə oldu. Belə layihələrin davamlı olmasını çox istərdim. Təkcə MKM deyil, digər müsabiqələr də keçirilsin. Hər bir yazıçı üçün vacib məqam onun kitabının oxunmasıdır. Kitab haqqında rəy yazsınlar, tənqid olunsun, tərifləsinlər və s. Üstəlik pul mükafatı da varsa, bu, lap yaxşıdır. MKM çox maraqlı bir layihədir. Layihə davam edəcək, sadəcə, sponsorlara ehtiyacımız var. Sponsor axtarışındayıq. Bu prosesi həll edəndən sonra davam edəcəyik”.
Dükan sahibinin fikirincə, Azərbaycanda kitaba olan laqeyd münasibət əvvəllər olduğu kimi qalmaqda davam edir:
"Laqeydlik davam edir, ikinci bir tərəfdən isə proses dəyişilir. Bir mağazamız vardı, bütün oxucuları üzdən tanıyırdıq. Oxucu auditoriyası hədsiz zəif idi. Bütün ölkədə 100-200 oxucu vardı. İndi isə bizim böyük auditoriyamız vardı. Amma yenə də oxucu sayı çox azdır. Hesab edirəm ki, Azərbaycan üçün hardasa 1500 kitab mağazası olmalıdır. Bu, belə deyil və inanmıram ki, yaxın gələcəkdə vəziyyət dəyişə. Bir necə problem var. Ancaq yenə də ümidimi itirmirəm”.
Nigar Köçərli deyir ki, 15 il əvvəlki oxucu ilə bugünkü oxucu arasında böyük fərq var:
"Əvvəllər rus dilində oxuyurdular, Azərbaycan dilində oxuyanlar az idi. Üstəlik kitab da az idi. Vəziyyət dəyişilir. Biz "Qanun” Nəşrlər Evi ilə birlikdə bazara yeni kitablar təqdim edirik. Oxucular çoxalır. Mənim ən böyük arzum odur ki, bütün Azərbaycanın hər yerində kitab dükanları olsun. Hamıya yaxın olan bir yerdə kitab mağazalarının olması müsbət haldır”.(hit.az)
pia.az
Digərxəbərlər
Populyar xəbərlər
