Belarus prezidenti Ermənistanın Baş nazirinə xəbərdarlıq edib...

Ermənistanın Baş naziri Nikol Paşinyan Minskdə KTMT sammitinə getməkdən imtina etdikdən sonra Belarus prezidenti Aleksandr Lukaşenko siyasətçini “parçalanmaya doğru tələsik addımlar” atmaması barədə xəbərdarlıq edib.

Poliqon xəbər verir ki, bu barədə Lukaşenkonun mətbuat katibi Natalya Eysmont danışıb. Mətbuat katibinin sözlərinə görə, bir gün əvvəl, noyabrın 14-də Aleksandr Lukaşenko ilə Nikol Paşinyan arasında telefon danışığı olub, söhbət zamanı Ermənistan baş nazirinin KTMT-nin ənənəvi illik sammitinə getməkdən imtina etməsi müzakirə olunub.

“Prezident öz təcrübəsinə və oxşar situasiyalarda bəzi digər tanınmış siyasətçilərin hərəkətlərinə əsaslanaraq təklif edib ki, Ermənistanın Baş naziri tələsməməli, tələsik qərarlar verməməli, parçalanmağa yönələ biləcək növbəti addımları ciddi düşünməlidir”, deyə xanım Eysmont Belarusun BelTA dövlət agentliyinə bildirib.

Xatırladaq ki, Rusiya prezidentinin mətbuat katibi Dmitri Peskov brifinq zamanı Ermənistan Baş nazirinin KTMT sammitinə getməmək qərarından təəssüfləndiyini bildirib.

Qeyd edək ki, noyabrın 23-də Belarusun paytaxtında KTMT sammitinin keçirilməsi planlaşdırılır. Təşkilatın qalan üzv dövlətlərinin rəhbərləri tədbirdə şəxsən iştirak etmək niyyətlərini açıqlayıblar. Ermənistan rəhbərliyinin nümayəndələri əvvəllər dəfələrlə KTMT çərçivəsində keçirilən işçi görüşlərdə iştirakdan imtina ediblər və Nikol Paşinyan Qərb mediasına müsahibəsində təşkilatı tənqid edib və onun fəaliyyətindən narazılığını bildirib.

Poliqon.info