Mayın 31-də Azərbaycanda ilk dəfə autizm sindromlu uşaqların I Autizm Mədəniyyət Festivalı təşkil olunub
Tədbirdə autizmli uşaqlar incəsənətin müxtəlif sahələrində istedadlarını nümayiş etdirib, cəmiyyətin ayrılmaz bir hissəsi olduqları mesajını veriblər.
"Uşaqların Xoşbəxt Gələcəyi", "Birgə və Sağlam" təşkilatlarının, "Ümid var" xeyriyyə könüllülərinin təşkilatçılığı, Heydər Əliyev Fondunun dəstəyi ilə Heydər Əliyev Mərkəzində keçirilən festivalda Heydər Əliyev Fondunun vitse-prezidenti Leyla Əliyeva da qatılıb.
AS Şirkətlər Qrupunun “Renessans Palace” layihəsi ilə baş sponsorluq etdiyi I Autizm Mədəniyyət Festivalında uşaqlar pianoda və xor şəklində mahnılar ifa ediblər, podiumda model kimi bacarıqlarını göstəriblər. On nəfər balaca model Leyla Əliyevanın əsəri köçürülmüş parçadan hazırlanan kolleksiyanı təqdim edib.
Festivala Türkiyədən də istedadlı autizmli uşaqlar qatılıblar. İzmir Autizm Orkestri - İZOT xor qrupu tədbirdə maraqlı proqramla çıxış edib.
Tədbirdə iştirak edən Əməkdar artist Tünzalə Ağayeva və başqaları autizmli uşaqların yanında olduqlarını nümayiş etdiriblər.
Festival çərçivəsində, həmçinin Dövlət Pantomim Teatrının aktyorlarının və cəmiyyətdə tanınan bir sıra peşə sahiblərinin iştirakı ilə “Autizm fərqli və bizdən biri” mövzusunda fləşmob təqdim olunub.Tədbir ərzində autizm barədə qısametrajlı filmlər, sosial çarx, klip göstərilib, bukletlər paylanılıb.
pia.az