Avstriya Xarici İşlər Nazirliyi dörd rus diplomatın diplomatik statusunu ləğv edib…
PİA.az xarici mətbuata əsasən xəbər verir ki, bu barədə fevralın 2-də Avstriya Xarici İşlər Nazirliyinin “Twitter” hesabında məlumat verilib.
“Rusiya səfirliyinin iki diplomatı diplomatik statusla bir araya sığmayan hərəkətlər edib. Nəticədə onlar “Diplomatik Münasibətlər haqqında Vyana Konvensiyası”nın 9-cu maddəsinə uyğun olaraq persona non-qrata elan ediliblər”, deyə məlumatda bildirilir.
Qeyd edək ki, belə bir ifadə tez-tez diplomatik missiyaları casusluqda ittiham edərkən istifadə olunur.
Bundan əlavə, Rusiyanın BMT-dəki daimi nümayəndəliyinin iki diplomatı qərargah sazişinin müddəalarını pozan hərəkətlərə yol verib, deyə Avstriya Xarici İşlər Nazirliyinin məlumatında bildirilir. Onlar da Avstriya ərazisini tərk etməlidirlər.
Persona non-qrata elan edilən dörd rusiyalı diplomat bir həftə ərzində, yəni fevralın 8-dən gec olmayaraq Avstriyanı tərk etməlidir.
Rusiya Xarici İşlər Nazirliyi Avstriya Xarici İşlər Nazirliyinin bəyanatını şərh etməyib.
pia.az