“Vaqner” ÖHŞ Çin şirkəti “Beijing Yunze Technology Co Ltd” ilə iki peykin alınması və onların köməyi ilə çəkilmiş şəkillərin kəşfiyyat istifadəsi üçün müqavilə bağlayıb...
Poliqon xəbər verir ki, bu barədə AFR məlumat yayıb. Agentliyin əldə etdiyi sənədə əsasən, müqavilə 2022-ci il noyabrın 15-də bağlanıb. Müqavilənin məbləği 235 milyon yuan (indiki məzənnə ilə demək olar ki, 33 milyon dollar) olub.
Sazişin tərəfləri Çinin “Beijing Yunze Technology Co Ltd” şirkəti və ötən ilin noyabrında “Vaqner” OHŞ-nin təsisçisi Yevgeni Priqojinin biznes strukturuna daxil olan Rusiyanın “Nika-Frut” şirkəti olub.
AFP-in Avropa təhlükəsizlik xidmətindəki mənbəsi iddia edir ki, “Vaqner” OHŞ Ukraynadakı döyüş əməliyyatları zamanı və Afrikadakı öz əməliyyatlarında kəşfiyyat üçün peyklərdən istifadə edib. Bundan əlavə, Agentliyin mənbələrinin sözlərinə görə, 2023-cü il may ayının sonunda, “Vaqner” üsyanından bir neçə həftə əvvəl ÖHŞ nümayəndələri Rusiya-Ukrayna sərhədindən Moskvaya qədər ərazinin peyk şəkillərini tələb ediblər. AFP qeyd edir ki, müqavilənin özündə Rusiya ərazisinin şəkillərinin sifariş edilməsindən bəhs edilmir.
Avqustun 23-də Yevgeni Priqojin və daha 9 nəfərin olduğu şəxsi Embraer Legacy 600 təyyarəsi Tver vilayətində qəzaya uğrayıb. Bütün sərnişinlər və ekipaj üzvləri həlak olub.
Dünən, oktyabrın 5-də prezident Vladimir Putin bildirib ki, Rusiya İstintaq Komitəsinin rəhbəri Aleksandr Bastrıkin ona Yevgeni Priqojinin qəzaya uğraması nəticəsində həlak olanların cəsədlərində qumbara parçaları olması barədə məlumat verib.
Poliqon.info