Abşeronda əxlaqsızlıq yuvası: Qardaşların "Pəhləvan"da şok əməlləri

Nərimanov rayon Məhkəməsində hakim Samir Məmmədovun sədrliyi ilə baş tutan prosesdə Qabil Ramazanov barəsində istintaq orqanının təqdimatı təmin olunub.

Onun barəsində 3 ay müddətinə həbs qətimkan tədbiri seçilib.

Qabil Ramazanovla birlikdə saxlanılan qardaşı Habil Ramazanov və tanışı Yalçın Əzimov barəsində başqa yerə getməmək haqda qətimkan tədbiri seçilib.

İstintaq orqanı tərəfindən Qabil Ramazanovun barəsində Cinayət Məcəlləsinin 244.2.2-ci (qabaqcadan əlbir olan bir qrup şəxs və ya mütəşəkkil dəstə tərəfindən əxlaqsızlıq yuvaları saxlama) və 234.4.3-cü (qanunsuz olaraq külli miqdarda narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma) maddələri ilə ittiham elan edilib.

Digər iki təqsirləndirilən Habil Ramazanov və Yalçın Əzimovun barəsində isə Cinayət Məcəlləsinin 244.2.2-ci maddəsi ilə ittiham verilib.

Qabil Ramazanov, Habil Ramazanov və Yalçın Əzimovun saxlanılması üçün əməliyyatı Daxili İşlər Nazirliyinin İnsan Alverinə qarşı Mübarizə Baş İdarəsi tərəfindən keçirilib.

Abşeron rayonunda yerləşən “Pəhləvan” kafesində keçirilən əməliyyat nəticəsində məlum olub ki, kafedə xüsusi hazırlanmış otaqlarda qadınlar kişi müştərilərə pul müqabilində intim xidmət göstəriblər.

Həmin kafeni işlədən Qabil Ramazanov, qardaşı Habil Ramazanov və Yalçın Əzimov həmin obyektdə əxlaqsızlıq yuvası təşkil etməklə qazanc əldə etdikləri üzə çıxıb.

Bundan başqa, həbs olunan zaman Qabil Ramazanovdan külli miqdarda narkotik vasitə aşkar olunub.

Cinayət işi üzrə istintaq davam edir.(Teleqraf.com)

pia.az