Natiq Cəfərli: Böyük sülh müqaviləsi vacibdir...

İqtisadçı-ekspert: “Azərbaycanla Ermənistan arasında birbaşa danışıqlar baş tutarkən daha effektiv olur”.

“Bu sülh müqaviləsinin olması baş tutacaqsa, (biz hamımız ümid edirik ki, bu il bu baş tutacaq) bu zaman Cənubi Qafqazın özü üçün də yeni perspektivlər açılır”.

Bu sözləri iqtisadçı-ekspert Natiq Cəfərli Azərbaycanla Ermənistan arasında gözlənilən sülh sazişinin bölgəyə iqtisadi və siyasi təsirlərini Poliqon-a şərh edərkən qeyd edib.

Ermənistandan və Qərbdən səsləndirilən fikirlərə baxarsaq, Azərbaycanla Ermənistanın sülh sazişi imzalanması çətin və uzun proses kimi görünür. Eyni zamanda sülh prosesinin hər an dayanması təhlükəsi də ortalıqdadır və bu təhlükəni yaradan daha çox Qərbin vasitəçi kimi prosesə yanaşmasıdır.

Sülh sazişi imzalamadan Azərbaycan və Ermənistanın müharibə olmadan yanaşı yaşaması mümkün görünürmü və ümumiyyətlə, hazırkı status-kvo ilə Azərbaycanla Ermənistan arasında sülh müqaviləsinin olmaması bölgənin iqtisadi və siyasi həyatına necə təsir edə bilər?

Mövzunu Poliqon-un əməkdaşı iqtisadçı-ekspert Natiq Cəfərli ilə müzakirə edib.

Natiq Cəfərli: “Qarşılıqlı ərazi bütövlüyünün tanınması, delmitasiya və demarkasiyanın prinsipləri, kommunikasiyaların açılması prinsipləri ilə bağlı ard-arda protokollar imzalana bilər”.

Cənubi Qafqazda yeni logistik imkanların, yeni tranzit imkanların, yeni iqtisadi münasibətlərin mövcud olacağını proqnoz edən ekspert Poliqon-a bildirib ki, bütün bunlar Cənubi Qafqazda hər üç ölkənin də yararınadır:

“Azərbaycanla Ermənistan arasında birbaşa danışıqlar baş tutarkən daha effektiv olur. Yəni hansısa kənar müdaxilələr olmadan danışıqlar daha tez və effektli irəliləməyə başlayır. Təbii ki, böyük sülh sazişinin imzalanmasında müəyyən çətinliklər var. Amma bu heç də o demək deyil ki, böyük sülh sazişi bir sənədlə imzalana bilər.

Onun da komponentləri var. Müxtəlif məsələlər üzrə ümumi razılaşmaya gəlib, ard-arda sülh müqaviləsinin təməlini təşkil edəcək protokollar da imzalana bilər. Bunlar qarşılıqlı ərazi bütövlüyünün tanınması, delmitasiya və demarkasiyanın prinsipləri, kommunikasiyaların açılması prinsipləri ilə bağlı ard-arda protokollar imzalana bilər. Bu da dayanıqlı sülh prosesinə töhvə verə bilər və ümumi sülh müqaviləsinin təməlini, onun onurğasını təşkil edə bilər.

Əlbəttə ki, böyük sülh müqaviləsi vacibdir. Bu sülh müqaviləsinin olması baş tutacaqsa, (biz hamımız ümid edirik ki, bu il bu baş tutacaq) bu zaman Cənubi Qafqazın özü üçün də yeni perspektivlər açılır. Yəni Cənubi Qafqazda yeni logistik imkanlar, yeni tranzit imkanları, yeni iqtisadi münasibətlər mövcud olacaq. Bütün bunlar Cənubi Qafqazda hər üç ölkənin də yararınadır”.

Nərminə UMUDLU
Poliqon.info