WP: Mərkəzi Kəşfiyyat İdarəsi Əfqanıstanda on il boyunca gizli “antitiryək” əməliyyatı aparıb

Poliqon xəbər verir ki, The Washington Post qəzetinin araşdırmasına əsasən, ABŞ Mərkəzi Kəşfiyyat İdarəsi (MKİ) 2004–2015-ci illər arasında Əfqanıstanda heroin istehsalının əsasını təşkil edən xaşxaş bitkisinin keyfiyyətini süni şəkildə aşağı salmaq məqsədilə gizli bioloji proqram həyata keçirib.

Nəşrin məlumatına görə, MKİ-yə məxsus təyyarələr 2004-cü ildən başlayaraq Əfqanıstanın Nəngərhar və Hilmənd vilayətləri üzərində xüsusi olaraq yetişdirilmiş xaşxaş toxumlarını havadan səpiblər. Bu toxumlar adi seleksiya üsulları ilə yaradılmış və demək olar ki, sıfır miqdarda heroin üçün lazım olan maddələrə malik bitkilər yetişdirirdi. Məqsəd həmin toxumların yerli xaşxaş növləri ilə çarpaz tozlanması nəticəsində ümumi məhsulun tərkibindəki narkotik maddələrin miqdarını azaltmaq olub.

Proqram MKİ-nin cinayətkarlıq və narkotiklərlə mübarizə mərkəzi vasitəsilə maliyyələşdirilib və o qədər məxfi aparılıb ki, hətta Pentaqon və ABŞ Dövlət Departamentinin bəzi yüksək vəzifəli rəsmiləri belə onun mövcudluğundan xəbərsiz olublar.

Layihədə iştirak edən mənbələrin sözlərinə görə, əməliyyat bir müddət Əfqanıstanda istehsal olunan xaşxaşın keyfiyyətini həqiqətən zəiflədib, lakin proqramın davam etdirilməsi çox baha başa gəlib və gözlənilən nəticələri vermədiyi üçün 2015-ci ildə dayandırılıb.

Ekspertlər qeyd edirlər ki, bu cür gizli əməliyyatlar ABŞ-ın Əfqanıstanda narkotik istehsalı və ticarətinə qarşı apardığı siyasətin az tanınan, lakin strateji cəhdlərindən biridir. Bununla belə, proqramın uzunmüddətli ekoloji və iqtisadi nəticələri barədə məlumatlar hələ də tam öyrənilməyib.

Poliqon.info