Vens: Maskın partiya yaratmaq planı böyük səhvdir...

Poliqon xəbər verir ki, ABŞ vitse-prezidenti Cey Di Vens iş adamı İlon Maskın siyasi partiya qurmaq cəhdlərini “böyük səhv” adlandırıb. Fox News-a müsahibəsində Vens bildirib ki, Mask artıq Donald Trampın administrasiyasında fəaliyyət göstərdiyi üçün Respublikaçılarla Demokratlar arasında neytral mövqe tutmaq imkanını itirib.

Vensin sözlərinə görə, milyarder ictimaiyyət tərəfindən artıq sağçı düşərgənin tərəfdarı kimi qəbul olunur və buna görə də onun yenidən “mərkəzçi siyasi xəttə” qayıtmaq planı qeyri-real görünür. ABŞ vitse-prezidenti əlavə edib ki, Maskın daha səmərəli addımı ideyalarını Respublikaçı Partiya daxilində təşviq etmək, beləliklə siyasi proseslərə daha böyük təsir imkanları əldə etmək olardı.

Xatırladaq ki, 5 iyulda İlon Mask ABŞ-da “Amerika” adlı yeni partiyanın yaradıldığını elan etmişdi. Lakin The Wall Street Journal yazır ki, iş adamı təşəbbüsü dayandırıb. Nəşrin məlumatına görə, Mask bu addımı Respublikaçı Partiyanın seçici səslərini parçalamamaq üçün atıb.

Ekspertlər hesab edirlər ki, Maskın siyasətə aktiv qoşulması ABŞ-da mövcud siyasi balansı dəyişə bilərdi. Lakin milyarderin yeni partiya qurmaq əvəzinə mövcud siyasi qüvvələrin içində möhkəmlənməsi onun üçün daha təsirli və praktiki addım hesab olunur.

Poliqon.info