Rusiya-Ukrayna sərhədi hardan keçəcək?

Mayami yaxınlığında keçirilən beş saatlıq görüş gərgin, lakin məhsuldar sayılıb.

Poliqon xəbər verir ki, ABŞ və Ukrayna rəsmiləri arasında bazar günü Florida ştatının Mayami şəhəri yaxınlığında keçirilən danışıqların mərkəzində bir əsas sual dayanıb: mümkün sülh sazişi çərçivəsində Rusiya ilə faktiki sərhəd haradan keçəcək?

Axios nəşrinin məlumatına görə, görüş beş saata yaxın davam edib və tərəflər arasında intensiv, gərgin müzakirələr aparılsa da, iştirakçılar bunu “məhsuldar irəliləyiş” kimi qiymətləndiriblər. Məlumata əsasən, toplantıda ABŞ-dan nümayəndə heyətinə Dövlət katibi Marko Rubio, Ukrayna tərəfindən isə Təhlükəsizlik Şurasının katibi Rustem Umerov rəhbərlik edib.

Müzakirələr zamanı sərhədin xəritə üzərində haradan keçməli olduğu, təhlükəsizlik təminatlarının hansı mexanizmlərlə işləyəcəyi, mümkün tampon zonaların yaradılıb-yaradılmayacağı və Ukraynanın gələcək müdafiə modelinin necə formalaşacağı kimi məsələlərə xüsusi diqqət yetirilib. Tərəflər həmçinin Rusiya ilə aparılan dolayı siqnallar və Moskvanın hazırkı mövqeyi barədə fikir mübadiləsi aparıblar.

Axios yazır ki, görüşün gərgin keçməsinə baxmayaraq, tərəflər müəyyən prinsipial məsələlərdə yaxınlaşma əldə edib. ABŞ nümayəndələri Ukraynanın təhlükəsizlik təminatları olmadan yeni sərhəd xəttinin mənasız olacağını vurğulayıb. Ukrayna rəsmiləri isə hər hansı güzəştin yalnız geniş beynəlxalq təminatlar və uzunmüddətli təhlükəsizlik zəmanətləri müqabilində mümkün olduğunu bildiriblər.

Mənbələrə görə, qarşıdakı günlərdə ABŞ və Ukrayna komandaları texniki detalları dəqiqləşdirmək üçün danışıqları davam etdirəcəklər. Məsələnin növbəti dəfə yüksək səviyyədə müzakirəyə çıxarılacağı gözlənilir.

Poliqon.info