Merts Ukrayna sülh planına öz təklifini təqdim edəcək

Poliqon xəbər verir ki, Almaniya kansleri Fridrix Merts Ukrayna müharibəsinə son qoyulması üçün hazırladığı ayrıca təklifi yaxın günlərdə Cenevrədə danışıqlar aparan nümayəndələrə təqdim edəcəyini bildirib. Bu barədə məlumatı N-tv yayıb. Merts Yohannesburqda G20 sammitindən sonra jurnalistlərə açıqlamasında bildirib ki, onun hazırladığı paket ABŞ-nın təqdim etdiyi 28 maddəlik planın hüdudlarından kənara çıxan əlavə elementlərdən ibarətdir.

Kansler detalları açıqlamasa da, bəzi siyasi müşahidəçilər sənədin Avropanın təhlükəsizlik arxitekturası, Ukraynanın müdafiə qabiliyyətinin gücləndirilməsi və münaqişənin uzunmüddətli nizamlanması ilə bağlı daha konkret mexanizmlər təklif edə biləcəyini istisna etmirlər. Merts daha əvvəl də Aİ ölkələrinin mövqeyinin danışıqlarda daha qəti şəkildə ifadə olunmasının vacibliyini vurğulamışdı.

Onun yeni təşəbbüsü Avropa daxilində diplomatik aktivliyin artdığı, Tramp administrasiyasının 28 maddəlik planına qarşı paralel təkliflərin formalaşdığı bir dövrə təsadüf edir. Cenevrədə keçiriləcək görüşlərin bu sənədlər arasında uzlaşdırma aparılması baxımından həlledici ola biləcəyi gözlənilir.

Poliqon.info