Trampdan Zelenskiyə ultimatum kimi mesaj: Razılaşmasa, təkbaşına istədiyi qədər savaşar...

Poliqon xəbər verir ki, Amerika Birləşmiş Ştatlarının prezidenti Donald Tramp Ukrayna prezidenti Vladimir Zelenskinin təklif olunan sülh planı ilə razılaşmayacağı təqdirdə baş verəcək ssenarini açıqlayıb.

Trampın sözlərinə görə, əgər rəsmi Kiyev Vaşinqtonun münaqişənin həlli ilə bağlı təşəbbüslərini rədd edərsə, Ukrayna ABŞ-nin dəstəyindən tamamilə məhrum ola bilər. Jurnalistlərin "Əgər Zelenski sizin planınızla razılaşmasa, nə baş verəcək?" sualına Ağ Ev rəhbəri olduqca sərt reaksiya verib:

"O zaman o (Zelenski), var gücü ilə mübarizəni davam etdirə bilər", deyı Tramp bildirib..

Siyasi şərhçilər bu bəyanatı ABŞ-nin Ukraynaya ayırdığı hərbi və maliyyə paketlərinin dayandırılacağı barədə ciddi xəbərdarlıq kimi qiymətləndirirlər. Trampın bu yanaşması onu göstərir ki, yeni administrasiya müharibəni bitirmək və tərəfləri danışıqlar masasına məcbur etmək üçün ABŞ-nin əlindəki "maliyyə rıçaqlarından" istifadə etməkdə qərarlıdır. Bu isə faktiki olaraq Ukraynanın Rusiya qarşısında təkbaşına qalması deməkdir.

Xatırladaq ki, Donald Tramp seçki kampaniyası dövründən bəri Rusiya-Ukrayna müharibəsini qısa müddətdə dayandıracağını və ABŞ-nin xaricdəki münaqişələrə sərf etdiyi resursları məhdudlaşdıracağını dəfələrlə bəyan edib.

Poliqon.info