Kamala Harris rəsmən Demokratlar Partiyasından prezidentliyə namizəd olub

Poliqon CNN telekanalına istinadən xəbər verir ki, xanım Harris bu barədə Filadelfiyada tərəfdarlarının mitinqində çıxışı zamanı bildirib.

“Mən bu gün qürurla elan etmək üçün sizin qarşınızda dururam ki, mən indi rəsmi olaraq Demokratlar Partiyasının ABŞ prezidentliyinə namizədiyəm. Beləliklə, indi etməli olduğumuz bir şey var. Biz ümumi seçkilərə getməliyik və bu seçkilərdə qalib gəlməliyik”, deyə ABŞ prezidentliyinə namizəd bildiriib.

Filadelfiyada keçirilən mitinqdə Harrisin vitse-prezident seçdiyi Minnesota qubernatoru Tim Uolz da iştirak edib. Uolz Kamala Harrisə ona göstərdikləri etimada görə minnətdarlığını bildirib. Buna cavab olaraq ABŞ prezidentliyinə namizəd ölkəni bütün amerikalıların xeyrinə idarə edəcəyinə söz verib.

Qeyd edək ki, bazar ertəsi, Demokratik Milli Komitə Kamala Harrisin prezidentliyə namizədliyini qazandığını elan etdi. Komitənin məlumatına görə, o, partiyanın virtual çağırışında iştirak edən 4567 nümayəndənin 99%-ni qazanıb.

Xatırladaq ki, iyulun 21-də ABŞ-ın hazırkı prezidenti Co Bayden prezidentlik yarışından namizədliyini geri götürmək qərarını açıqlayıb. Bunun müqabilində o, Demokratlar Partiyasından Kamala Harrisin namizədliyini irəli sürməyi təklif edib. Bir həftə ərzində Harris 200 milyon dollar ianə toplaya bilib. Morning Consult sorğusuna görə, bütün yeddi əyalətdə Kamala Harrisi seçicilərin 48%-i, Donald Trampı isə 47%-i dəstəkləyib.

Poliqon.info