Münhen Təhlükəsizlik Konfransı sülh ümidlərini doğrultmaya bilər

Son üç il ərzində Münhen Təhlükəsizlik Konfransı Rusiya ilə Ukrayna arasında davam edən müharibə fonunda mühüm diplomatik təmasların əsas platformalarından biri olub. Lakin bu il keçiriləcək toplantının daha çox danışıqlar prosesinin dalana dirəndiyini nümayiş etdirəcəyi gözlənilir.

Poliqon xəbər verir ki, altı avropalı rəsmi şəxs Politico nəşrinə bildirib ki, konfrans çərçivəsində Ukrayna müharibəsi ilə bağlı hər hansı konkret irəliləyiş və ya razılaşma əldə olunacağına dair gözləntilər minimaldır. Onların sözlərinə görə, görüşlər əsasən siyasi bəyanatlar və Ukraynaya dəstək mesajları ilə yadda qala bilər.

Məlumata əsasən, ABŞ administrasiyası Kiyevə açıq şəkildə çatdırıb ki, Ukraynanı gələcək mümkün Rusiya təcavüzündən qorumağa yönəlmiş təhlükəsizlik zəmanətləri üzrə yekun saziş yalnız Moskva ilə ümumi atəşkəs və ya sülh razılaşması əldə edildikdən sonra rəsmiləşdirilə bilər. Bu barədə iki avropalı və bir yüksək vəzifəli amerikalı rəsmi məlumat verib.

Hazırkı mərhələdə əsas maneə tərəflərin ərazi məsələsində barışmaz mövqeləridir. Rusiya işğal altında saxladığı ərazilərlə bağlı tələblərini dəyişməz saxlayır və onları danışıqlar masasının əsas şərti kimi irəli sürür. Ukrayna isə suverenliyi və ərazi bütövlüyü ilə bağlı güzəştə getməyəcəyini bəyan edir. Bu ziddiyyətlər sülh prosesini faktiki olaraq dalana dirəyib.

Diplomatik mənbələr hesab edirlər ki, Münhendə keçiriləcək görüşlər daha çox tərəflərin mövqelərinin bir daha səsləndirilməsi və Qərb ölkələrinin Ukraynaya siyasi həmrəyliyinin nümayişi ilə məhdudlaşacaq. Bununla belə, ekspertlər qeyd edirlər ki, rəsmi razılaşma əldə olunmasa belə, belə platformalar tərəflər arasında kommunikasiya kanallarının açıq qalması baxımından əhəmiyyətini qoruyur.

Beləliklə, builki Münhen konfransı real sülh irəliləyişindən çox, Ukrayna müharibəsi üzrə danışıqların hansı mərhələdə olduğunu və mövcud geosiyasi reallıqları əks etdirən simvolik bir tədbir kimi yadda qala bilər.

Poliqon.info