Merilend ştatının baş prokuroru Trampa qarşı iddia qaldırıb

ABŞ-nin Merilend ştatının baş prokuroru Entoni Braun prezident Donald Tramp administrasiyasına qarşı məhkəmə iddiası qaldırıb. İddiaya səbəb qeyri-qanuni miqrantlar üçün nəzərdə tutulan federal saxlanma mərkəzinin tikintisidir.

Poliqon xəbər verir ki, bu barədə ştat prokurorluğunun yaydığı rəsmi məlumatda bildirilir.

Açıqlamada qeyd olunur ki, baş prokuror Entoni G. Braun Merilend ştatının Vaşinqton dairəsində genişmiqyaslı federal miqrant saxlanma mərkəzinin “qanunsuz tikintisini dayandırmaq” məqsədilə məhkəməyə müraciət edib. İddiada bildirilir ki, layihə müvafiq ekoloji ekspertiza aparılmadan, ictimaiyyətin iştirakı təmin edilmədən və ştat hakimiyyəti ilə məsləhətləşmə aparılmadan həyata keçirilir.

Məhkəmə sənədlərinə əsasən, ABŞ-nin Daxili Təhlükəsizlik Nazirliyi və İmmiqrasiya və Gömrük Xidməti federal vergi daxilolmalarından 100 milyon dollardan artıq vəsait xərcləyərək Uilyamsport şəhəri yaxınlığında yerləşən anbar binasını alıb. Həmin obyektin miqrant saxlanma mərkəzinə çevrilməsi planlaşdırılır.

Baş prokurorun sözlərinə görə, Uilyamsportdakı anbarın alınması ölkə üzrə kütləvi saxlanma infrastrukturu yaradılması istiqamətində daha geniş planın tərkib hissəsidir. Bildirilir ki, müxtəlif ştatlarda iri anbarlar alınaraq yenidən qurulur və on minlərlə insanın yerləşdirilməsi üçün nəzərdə tutulmuş saxlanma mərkəzlərinə çevrilir.

Prokurorluğun açıqlamasında vurğulanır ki, Merilend ştatı insanları qeyri-insani, antisanitar və təhlükəli saxlanma şəraitindən qorumaq niyyətindədir. Ştat rəhbərliyi hesab edir ki, bu cür obyektlərin yaradılması həm hüquqi prosedurların, həm də insan hüquqlarının pozulması riskini artırır.

Beləliklə, Tramp administrasiyasının miqrasiya siyasəti çərçivəsində həyata keçirilən saxlanma mərkəzlərinin genişləndirilməsi planı növbəti hüquqi maneə ilə üzləşib və məsələ məhkəmə müstəvisində araşdırılacaq.

Poliqon.info