Aİ Ermənistana Rusiyadan gələn təsirlərə qarşı mübarizə üçün 50 milyon avro ayırıb

Poliqon xəbər verir ki, Avropa İttifaqı Ermənistanın təhlükəsizlik və institusional dayanıqlığını artırmaq məqsədilə İrəvana 50 milyon avro maliyyə yardımı ayırıb. Bu barədə Aİ-Ermənistan Əməkdaşlıq Şurasının iclasından sonra keçirilən brifinqdə Avropa İttifaqının diplomatik xidmət rəhbəri Kaya Kallas məlumat verib.

Kallas bildirib ki, vəsait regionda mina təmizləmə fəaliyyətlərinin genişləndirilməsinə, həmçinin etimad qurucu mexanizmlərin yaradılmasına yönəldiləcək. O, çıxışı zamanı Ermənistanda vəziyyətə təsir göstərə bilən bəzi “Rusiya strukturlarının fəaliyyəti” barədə xəbərdarlıq edib və Brüsselin bu təsirlərin qarşısını almaq üçün İrəvana dəstək göstərdiyini vurğulayıb.

Aİ rəsmisinin sözlərinə görə, ayrılan maliyyə həm də Ermənistanın “xarici müdaxilələrin müəyyən edilməsi və onlara qarşı mübarizə qabiliyyətini gücləndirməyə” xidmət edəcək. Brüssel hesab edir ki, regionda sabitliyin möhkəmlənməsi, xüsusilə sülh təşəbbüslərinin irəliləməsi üçün İrəvanın institusional müstəqilliyinin artırılması vacibdir.

Analitiklər bu addımı Aİ-nin Cənubi Qafqazda geosiyasi mövqeyini gücləndirmək cəhdi kimi dəyərləndirir, həmçinin Ermənistanın son aylarda təhlükəsizlik orientasiyasını yenidən nəzərdən keçirməsinin Brüssellə əməkdaşlığı daha da dərinləşdirdiyini qeyd edirlər.

Poliqon.info