Araşdırma çərçivəsində onlarla məşqçi, menecer və hakim barəsində tədbir görülüb...
Poliqon xəbər verir ki, Türkiyənin hüquq mühafizə orqanları qanunsuz oyun mərcələri ilə bağlı araşdırma çərçivəsində 11 futbol klubunun 32 keçmiş və hazırkı funksionerini saxlayıb. Məlumatı NTV televiziya kanalı yayıb.
Əməliyyatlar cümə günü səhər saatlarında ölkənin 10 vilayətində eyni vaxtda keçirilib. Saxlanılanlar arasında yüksək liqada çıxış edən klubların nümayəndələri də var. Bildirilir ki, “Adana Demirspor”, “Antalyaspor” və “Alanyaspor” klublarının təmsilçiləri də istintaqa cəlb olunublar.
Bundan əvvəl Türkiyə Futbol Federasiyası son beş il ərzində peşəkar klubların 212 funksionerinin oyunlara qanunsuz mərc etdiyini müəyyən edib. Onların 108-i məşqçi, 104-ü isə klub meneceridir. Federasiya həmçinin oyunlara mərc üçün hesabları aşkar edilmiş 149 peşəkar hakimi səkkiz aydan bir ilədək müddətə oyunlardan kənarlaşdırıb. Araşdırma üzrə ümumilikdə 571 fəaliyyətdə olan hakim keçir, onlardan 371-nin mərc kontorlarında hesabı olduğu bildirilir.
Eyni zamanda, mərc işi üzrə intizam şurası qarşısına mindən artıq futbolçunun çıxarılacağı qeyd olunub. Türkiyənin ədliyyə naziri, bundan əvvəl İstanbulun baş prokuroru olmuş Akın Gürlek istintaqın genişləndirilə biləcəyini və bəzi futbol klublarının rəhbər şəxslərinin də saxlanılmasının mümkün olduğunu açıqlayıb. Onun sözlərinə görə, araşdırma yerli qurumlarla yanaşı beynəlxalq əməkdaşlıq çərçivəsində aparılır.
Hazırda istintaq tədbirləri davam edir və məsələ ölkə futbolunda son illərin ən böyük qalmaqallarından biri kimi qiymətləndirilir.
Poliqon.info
Populyar xəbərlər
