Kreml Vaşinqtonla münasibətləri bərpa etmək istəyir, düşmən olaraq isə oxları Londona yönəldir…
Poliqon xəbər verir ki, The Guardian nəşri Rusiyanın təbliğat məkanında əsas “xarici düşmən” obrazının ABŞ-dən Böyük Britaniyaya keçdiyini yazıb. Nəşrin təhlilinə görə, Londonla Moskva arasında əsrlər boyu davam edən geosiyasi rəqabət Ukrayna müharibəsi fonunda yeni gərginlik mərhələsinə yüksəlib və tərəflər arasındakı münasibətlər “tarixi minimuma” düşüb.
Kremlə yaxın media və rəsmilər Britaniyanı demək olar ki, bütün böyük beynəlxalq hadisələrin, “Şimal axını” qaz kəmərlərinin partladılmasından tutmuş, Rusiya pilotlarını “ələ almaq cəhdləri”nə qədər başlıca təşkilatçısı kimi təqdim edir. Bu narrativ Britaniyanı Rusiyanın əsas düşməni kimi göstərən geniş təbliğat kampaniyasına çevrilib.
Məqalədə qeyd olunur ki, belə bir dönüşün səbəblərindən biri də Moskvanın Donald Tramp administrasiyası ilə münasibətləri yaxşılaşdırmaq arzusu ola bilər. Kreml ABŞ-ı birbaşa hədəf almaq istəmir və buna görə də ittihamların mərkəzinə Böyük Britaniya çıxarılır. Beləliklə, “əsas günahkar” rolunun Vaşinqtondan Londona keçməsi Kremlin strateji mesajlaşmasının tərkib hissəsinə çevrilib.
Rusiya rəsmiləri Britaniyanı “eskalasiyaya təhrik etməkdə” və “Ukraynaya müharibəni davam etdirmək üçün motivasiya verməkdə” ittiham edir. Xüsusilə vurğulanır ki, London Kiyevə silah tədarükünü ilk başlayan ölkələrdən olub və bundan əlavə, Ukrayna ordusuna geniş kəşfiyyat məlumatları təqdim edir.
The Guardian yazır ki, Kreml diskursunda “anglosaksonlar” termini Qərbin vahid anti-Rusiya koalisiyasını təsvir edən ideoloji etiketə çevrilib, Britaniya kəşfiyyatı isə təbliğatın “sevimli hədəfləri” sırasındadır. “Levada Mərkəzi”nin sorğusuna görə, 49% rusiyalı Britaniyanı ölkənin əsas düşməni hesab edir; bu göstəricidə yalnız Almaniya ondan az fərqlə ikinci yerdədir.
Nəşr bildirir ki, Rusiya təbliğatının Britaniya barədə yaratdığı obraz ziddiyyətlidir: bir tərəfdən London “kolonial keçmişin kölgəsi” kimi zəif və təsirsiz göstərilir, digər tərəfdən isə qlobal proseslərə geniş təsir imkanına malik güclü dövlət kimi təqdim olunur. Buna baxmayaraq, son illər Britaniya Rusiyanın düşmənlər siyahısında xüsusi kateqoriyaya yüksəlib və bu tendensiya Moskvanın Avropa ilə ümumi münasibətlərinin pisləşməsindən daha sürətlə irəliləyir.
Poliqon.info
Populyar xəbərlər
