ABŞ Dövlət Departamentinin nümayəndəsi: Tramp diplomatiyanın uğuruna ümid edir, lakin realist olaraq qalır və bu səbəbdən sərt addımlar atmaqdan çəkinmir…
ABŞ prezidenti Donald Tramp Rusiya prezidenti Vladimir Putinin Ukrayna müharibəsi ilə bağlı mövqeyindən və addımlarından narazıdır.
Poliqon xəbər verir ki, bu barədə ABŞ Dövlət Departamentinin mətbuat xidmətinin rəhbəri Təmmi Bryus keçirdiyi brifinqdə bildirib.
Temmi Bryusun sözlərinə görə, Trampın bu mövzuda verdiyi açıqlamalar onun mövqeyini aydın şəkildə əks etdirir.
“Prezidentin öz sözləri onun vəziyyəti necə qiymətləndirdiyini və Vladimir Putinin hərəkətlərindən məmnun olub-olmadığını ən yaxşı şəkildə göstərir. Aydın şəkildə deyə bilərik ki, Tramp narazıdır”, deyə Bryus qeyd edib.
Dövlət Departamentinin nümayəndəsi əlavə edib ki, Tramp hazırkı vəziyyətdən təsirlənmir və məyusdur.
“Onun son bəyanatları Ukraynaya daha çox müdafiə silahlarının verilməsinə yönəlib. O, hər zaman diplomatik yolla nəticə əldə etməyə ümid edir, lakin realistdir. Dünya bunu artıq görüb. İran bunu gördü, indi isə Rusiya da Trampın yeni addımları vasitəsilə bunu anlayır. O, səbirli şəxsdir, lakin bu, öz baxışlarından və onları həyata keçirmək əzmindən geri çəkiləcəyi anlamına gəlmir”, deyə o vurğulayıb.
Xatırladaq ki, Donald Tramp bundan əvvəl Rusiya-Ukrayna müharibəsi ilə bağlı verdiyi bəyanatda Moskvanın mövqeyindən “çox narazı” olduğunu bildirmişdi. O, 50 gün ərzində döyüş əməliyyatları dayandırılmadığı təqdirdə ABŞ-ın Rusiya və onun tərəfdaş ölkələrinə qarşı 100 faiz həcmində əlavə gömrük rüsumları tətbiq edəcəyini bəyan etmişdi.
Poliqon.info
Populyar xəbərlər
