Qırğızıstanda parlament seçkiləri ərəfəsində kütləvi həbslər keçirilib

Poliqon xəbər verir ki, Qırğızıstanda növbədənkənar parlament seçkilərinə cəmi bir həftə qalmış sabiq prezident Almazbek Atambayevin ətrafı ilə əlaqəli bir qrup müxalif fəal kütləvi şəkildə saxlanılıb. Rusiyanın "Kommersant" qəzetinin yazdığına görə, saxlanılanlar arasında keçmiş dövlət başçısının oğlu Kadırbek Atambayev də var. Onlar seçkilərin nəticələri elan edildikdən sonra genişmiqyaslı etiraz aksiyaları təşkil etməyə hazırlaşmaqda, həmçinin bir sıra dövlət və media obyektlərini ələ keçirməyi planlaşdırmaqda ittiham olunurlar.

Kommer­sant nəşrinin məlumatına görə, ölkənin hüquq-mühafizə orqanları saxlanılanların administrativ binaların, televiziya kanallarının və güc strukturlarına məxsus obyektlərin tutulması ilə bağlı plan hazırladıqlarını iddia edir. Rəsmi qurumlar bunu dövlət sabitliyinə qarşı yönəlmiş təhlükəli fəaliyyət kimi qiymətləndirir.

Bununla belə, saxlanılan şəxslər ittihamları qəti şəkildə rədd edir və həbslərin siyasi motivli olduğunu bildirirlər. Onların sözlərinə görə, hakimiyyət seçkilər ərəfəsində hər hansı narazılığın qarşısını almaq üçün müxalif qüvvələri sıradan çıxarmağa çalışır. Müdafiə tərəfi saxlanılanların hüquqlarının pozulduğunu, istintaqın isə şəffaf aparılmadığını vurğulayır.

Ekspertlər hesab edirlər ki, son həbslər Qırğızıstanda seçkiqabağı siyasi gərginliyin artdığını göstərir. Ölkədə bir sıra müxalif qruplar seçki prosesinin şəffaflığı ilə bağlı ciddi narahatlıqlar ifadə edir və nəticələrin manipulyasiya edilə biləcəyindən ehtiyatlanır.

Poliqon.info