Yeni əməliyyat qrupu Qərb yarımkürəsində narkotik ticarətinə qarşı mübarizə aparacaq, ABŞ və region ölkələrinin hərbi qurumları ilə kəşfiyyat məlumatı mübadiləsini gücləndirəcək...
Poliqon xəbər verir ki, ABŞ Silahlı Qüvvələrinin Latın Amerikası və Karib hövzəsindəki fəaliyyətinə cavabdeh olan Cənub Komandanlığı narkotik ticarətinə qarşı mübarizə məqsədilə yeni əməliyyat qrupu yaradır. Komandanlığın mətbuat xidmətinin məlumatına görə, “Qərb yarımkürəsində narkotiklərlə mübarizə üzrə xüsusi bölmə” adlanan bu struktur regionda narkotik daşımalarını izləmək, ələ keçirmək, habelə ABŞ və tərəfdaş ölkələrin hüquq-mühafizə və hərbi orqanları ilə kəşfiyyat məlumatlarını paylaşmaqla məşğul olacaq.
Yeni bölmənin əsas məqsədi region ölkələrinin narkotiklərlə mübarizə imkanlarını artırmaqdır. Bunun üçün ABŞ hərbçiləri yerli tərəfdaşlara texniki məsləhətlər verəcək, təlimlər keçirəcək və birgə əməliyyatlar təşkil edəcək.
ABŞ müdafiə naziri Pit Hegsetin açıqlamasına görə, xüsusi bölmənin yaradılması barədə göstərişi prezident Donald Tramp verib. Nazir sosial şəbəkə X-də yazıb: “Mesaj aydındır: əgər siz narkotiki bizim sahillərimizə gətirmək istəyirsinizsə — biz sizi elə yerindəcə dayandıracağıq.”
Son həftələr ərzində ABŞ ordusu Venesueladan çıxan və narkotik daşıdığı ehtimal edilən gəmilərə hücumlar təşkil edib. NBC News-un sentyabrın sonunda yaydığı məlumata görə, Pentaqon artıq Venesuela ərazisində fəaliyyət göstərən kartellərə qarşı birbaşa əməliyyatlara hazırlaşır.
Venesuela prezidenti Nikolas Maduro bu planları “ölkənin daxili işlərinə açıq müdaxilə” adlandırıb və bildirib ki, ABŞ “narkotiklərlə mübarizə bəhanəsi ilə” Venesuelada marionet rejim qurmaq üçün müharibə başlatmaq niyyətindədir.
ABŞ Cənub Komandanlığı isə bildirir ki, yeni əməliyyat qrupu regionda sabitliyi və təhlükəsizliyi möhkəmləndirmək, narkotik ticarətinin maliyyə mənbələrini kəsmək məqsədi daşıyır.
Polion.info
Populyar xəbərlər
