Müctəba Xameneidən “Hizbullah”a mesaj: İran müqaviməti dəstəkləməkdə davam edəcək...

İranın ali lideri ayətullah Seyid Müctəba Xamenei “Hizbullah” hərəkatının baş katibi şeyx Naim Qasımə ünvanladığı məktubda İranın İsrail və ABŞ-yə qarşı müqavimət qüvvələrinə dəstəyinin davam edəcəyini vurğulayıb.

Poliqon xəbər verir ki, bu barədə Press TV məlumat yayıb.

Məktubda qeyd olunub ki, İran İslam Respublikasının siyasəti dəyişməz olaraq qalır və bu siyasət “sionist və Amerika düşməninə qarşı müqavimətin davamlı dəstəklənməsinə” əsaslanır. “Hizbullah” da öz növbəsində bəyan edib ki, Tehran tərəfindən ötürülən bu mesaj təşkilat üçün mühüm strateji və siyasi əhəmiyyət daşıyır.

Ayətullah Xamenei məktubunda bildirib ki, bu kurs əvvəlki illərdə formalaşmış xəttin davamıdır və bu yanaşma İranın əvvəlki ali liderlərinin və “Hizbullah”ın keçmiş rəhbərliyinin izlədiyi istiqamətə əsaslanır. Xüsusilə, bu siyasətin ideoloji və strateji təməllərinin regionda mühüm rol oynadığı vurğulanıb.

Analitiklər hesab edirlər ki, bu cür mesajlar Yaxın Şərqdə davam edən gərginlik fonunda İranın öz müttəfiqlərinə siyasi və mənəvi dəstəyini açıq şəkildə nümayiş etdirməsi kimi qiymətləndirilə bilər. Bu isə regionda qüvvələr balansına və gələcək proseslərə birbaşa təsir göstərə bilər.

Poliqon.info