İran hökuməti: ABŞ və İsrailin hücumları nəticəsində ölənlərin təxminən 30 faizi uşaqlardır...

Poliqon xəbər verir ki, İran hökuməti ABŞ və İsrailin ölkə ərazisinə endirdiyi zərbələr nəticəsində həyatını itirənlərin təxminən 30 faizinin uşaqlar olduğunu açıqlayıb.

İran hökumətinin mətbuat xidmətinin yaydığı məlumata görə, hərbi hücumlar nəticəsində ölkənin mülki infrastrukturu ciddi zərər görüb. Rəsmi məlumatlarda bildirilir ki, indiyədək 3090 yaşayış evi, 528 kommersiya obyekti və 13 tibb müəssisəsi hücumlara məruz qalıb.

Tehran rəsmiləri qeyd ediblər ki, zərər görən tibb müəssisələrindən 9-u Qırmızı Aypara təşkilatına məxsusdur. Bu barədə məlumatı İranın Tasnim agentliyi yayıb.

Xatırladaq ki, ABŞ və İsrail fevralın 28-dən etibarən İran ərazisinə hərbi zərbələr endirməyə başlayıb. Hücumlar nəticəsində ölkənin müxtəlif bölgələrində geniş dağıntılar baş verib və çoxsaylı insan tələfatı qeydə alınıb.

Bildirilib ki, hücumlar zamanı İranın ali rəhbəri ayətullah Əli Seyid Xamenei, eləcə də ölkənin bir sıra yüksək vəzifəli şəxsləri həlak olub. Tehran isə cavab olaraq İsrail ərazisinə və regiondakı ABŞ hərbi bazalarına raket zərbələri endirib.

Regionda hərbi eskalasiya bununla da genişlənib. Martın 2-də Livanın “Hizbullah” hərəkatı da İsrailə qarşı müharibəyə qoşulduğunu elan edib. Bundan sonra İsrail ordusu hərəkatın mövqelərinə qarşı hücum əməliyyatına başladığını açıqlayıb və ölkə qüvvələrinin Livanın cənubuna daxil olduğu bildirilib.

Analitiklərin fikrincə, Yaxın Şərqdə baş verən bu hadisələr regionda daha genişmiqyaslı müharibə riskini artırır və beynəlxalq təhlükəsizlik üçün ciddi çağırış yaradır.

Poliqon.info