ABŞ Prezidenti İranla nüvə sazişindən çıxma qərarını müdafiə edib...
Poliqon xəbər verir ki, ABŞ Prezidenti Donald Tramp sosial şəbəkə hesabında paylaşım edərək İranla imzalanmış Birgə Hərtərəfli Fəaliyyət Planından (BHFP) çıxmaq qərarını yenidən müdafiə edib. O bildirib ki, əgər onun administrasiyası keçmiş prezident Barak Obama dövründə imzalanmış nüvə sazişini ləğv etməsəydi, İran artıq üç il əvvəl nüvə silahına sahib ola bilərdi.
Donald Tramp paylaşımında sazişi “indiyədək bağlanmış ən təhlükəli razılaşma” adlandırıb və qeyd edib ki, həmin sənəd qüvvədə qalsaydı, hazırda beynəlxalq təhlükəsizlik mühiti tamamilə fərqli olardı. “Əgər mən Obamanın İranla bağladığı dəhşətli nüvə sazişini ləğv etməsəydim, İranın üç il əvvəl nüvə silahı olardı. Bu, indiyədək qoşulduğumuz ən təhlükəli saziş idi və qüvvədə qalsaydı, dünya indi tamam fərqli olardı”, – deyə o vurğulayıb.
Tramp paylaşımında keçmiş prezident Barak Obamanı və sabiq dövlət başçısı Co Baydeni də tənqid edib. O, məsuliyyətin onların üzərində olduğunu bildirib və fikrini emosional ifadələrlə tamamlayıb.
Xatırladaq ki, ABŞ 2018-ci ildə Donald Trampın qərarı ilə İranla imzalanmış BHFP-dən birtərəfli qaydada çıxıb və Tehrana qarşı sanksiyaları bərpa edib. Həmin saziş 2015-ci ildə İran və BMT Təhlükəsizlik Şurasının daimi üzvləri, eləcə də Almaniya arasında imzalanmışdı və İranın nüvə proqramının məhdudlaşdırılması qarşılığında sanksiyaların yumşaldılmasını nəzərdə tuturdu.
Son illərdə İranın nüvə proqramı ilə bağlı beynəlxalq narahatlıqlar yenidən artıb. ABŞ və İran arasında münasibətlər isə xüsusilə regionda baş verən hərbi gərginlik fonunda daha da kəskinləşib. Trampın son açıqlaması da məhz bu kontekstdə daxili və xarici auditoriyaya ünvanlanmış siyasi mesaj kimi qiymətləndirilir.
Poliqon.info
Populyar xəbərlər
