ABŞ və Ermənistan arasında atom enerjisi üzrə strateji əməkdaşlıq razılaşdırılıb

Poliqon xəbər verir ki, Ermənistanın baş naziri Nikol Paşinyan və ABŞ-nin vitse-prezidenti Cey Di Vens ikitərəfli danışıqların yekunlaşması ilə bağlı birgə bəyanat imzalayıblar. Sənəd ABŞ və Ermənistan arasında atom enerjisi sahəsində gələcək strateji əməkdaşlıq üçün hüquqi çərçivə formalaşdırır.

Rəsmi məlumata əsasən, imzalanmış bəyanat tərəflər arasında mülki nüvə energetikasının inkişafı, texniki əməkdaşlıq, təhlükəsizlik standartlarının yüksəldilməsi və yeni layihələrin həyata keçirilməsi istiqamətində koordinasiyanın dərinləşdirilməsini nəzərdə tutur. Sənəd həmçinin müvafiq sahədə uzunmüddətli tərəfdaşlığın institusional əsaslarının yaradılmasını hədəfləyir.

Danışıqlar zamanı enerji təhlükəsizliyi, Ermənistanın atom energetikası infrastrukturunun modernləşdirilməsi və beynəlxalq standartlara uyğunlaşdırılması məsələləri xüsusi diqqət mərkəzində olub. ABŞ tərəfinin bu prosesdə texnoloji və məsləhət dəstəyi göstərməsi imkanları da müzakirə edilib.

Rəsmi İrəvan bu razılaşmanı Ermənistanın enerji sektorunun şaxələndirilməsi və dayanıqlılığının artırılması baxımından mühüm addım kimi qiymətləndirir.

Poliqon.info