Tailand Kamboca sərhədi boyunca hava zərbələri endirib

Tailand ordusu Kamboca ilə mübahisəli sərhəd bölgələrinə hava zərbələri endirib.

Poliqon xəbər verir ki, bu barədə Reuters Agentliyinə Tailand Silahlı Qüvvələrinin rəsmi nümayəndəsi, general-mayor Vintay Suvari məlumat verib. Hadisə tərəflərin bir-birini atəşkəs razılaşmasını pozmaqda günahlandırmasından sonra baş verib.

AFP-nin məlumatına görə, son hərbi toqquşmalar nəticəsində bir tailandlı hərbçi həlak olub, dörd nəfər yaralanıb. Kamboca Müdafiə Nazirliyinin sözçüsü Məli Soçita bildirib ki, qarşıdurma səhər saatlarında Ubonraçatxani əyalətində başlayıb və iddia edib ki, qarşı tərəfə ilk hücumu Tailand qüvvələri edib. O əlavə edib ki, Kamboca atəş açmayıb və vəziyyəti müşahidə altında saxlayıb.

Kambocanın nüfuzlu siyasi fiqurlarından olan, keçmiş baş nazir Hun Sen tərəfləri təmkinə çağırıb və Tailandın addımlarını “silahlı təcavüz” və “provokasiya” adlandırıb. O bəyan edib ki, Kambocanın cavab tədbirləri üçün “qırmızı xətt” artıq müəyyən edilib və komandanlara şəxsi heyəti hazır vəziyyətdə saxlamaq göstərişi verib.

Tailand quru qoşunlarının İkinci Hərbi Dairəsinin məlumatına görə, sərhəd bölgələrindəki yaşayış məntəqələrinin təxminən 70%-i boşaldılıb. Ümumilikdə 35,6 min nəfər müvəqqəti sığınacaqlara köçürülüb.

Poliqon.info