Helsinki: Biz təminat yox, yalnız təhlükəsizlik tədbirlərinin təşkilinə dəstək verə bilərik…
Poliqon xəbər verir ki, Finlandiyanın baş naziri Petteri Orpo ölkəsinin Ukraynaya təhlükəsizlik təminatları təqdim etməyə hazır olmadığını, lakin təhlükəsizlik tədbirlərinin təşkilində kömək edə biləcəyini bildirib.
Yle nəşrinin məlumatına görə, Orpo bu açıqlamanı 2 dekabrda İsveçin baş naziri Ulf Kristerssonla birgə keçirdiyi mətbuat konfransında səsləndirib. Jurnalistlər onlara ABŞ-ın Ukraynaya təklif etdiyi təhlükəsizlik təminatları barədə məlumat verilib-verilmədiyini və bu mexanizmlərin NATO-nun Nizamnaməsinin beşinci maddəsinə uyğun olub-olmadığını soruşublar. Orpo bildirib ki, ABŞ-dan və ya digər partnyorlardan Finlandiyaya belə təminatlarla bağlı heç bir konkret təklif daxil olmayıb və Helsinki bu istiqamətdə detallarla tanış deyil.
“Təhlükəsizlik təminatları çox ciddi məsələdir. Biz onları verməyə hazır deyilik, amma təhlükəsizlik tədbirlərinin təşkilinə dəstək göstərə bilərik. Bunlar tamamilə fərqli anlayışlardır”, deyə Finlandiya baş naziri vurğulayıb.
Orpo həmçinin əlavə edib ki, real təhlükəsizlik təminatlarını praktik olaraq daha böyük Avropa ölkələri və ABŞ verə bilər. O, ABŞ-nin əvvəl təqdim etdiyi “28 bəndlik plan”da Finlandiyanın belə təminatlar verməyə hazır ölkələrdən biri kimi göstərilməsinə təəccübləndiyini də bildirib.
Poliqon.info
Populyar xəbərlər
