Ukrayna və Avropanın əsas müttəfiqləri ABŞ-Rusiya planının əsas müddəalarını rədd ediblər

Poliqon xəbər verir ki, Bloomberg Agentliyinin məlumatına görə, Ukrayna ilə aparıcı Avropa dövlətləri ABŞ və Rusiya arasında hazırlanmış sülh planının əsas hissələrini qəbulolunmaz hesab ediblər. Məlumata əsasən, Kiyevin ən böyük Avropa tərəfdaşları, Almaniyanın kansleri Fridrix Mers, Fransanın prezidenti Emmanuel Makron və Böyük Britaniyanın baş naziri Kir Starmer Ukrayna lideri Vladimir Zelenski ilə telefon danışığında vahid mövqe nümayiş etdiriblər.

Almaniya hökumətinin yaydığı açıqlamaya görə, tərəflər Ukrayna Silahlı Qüvvələrinin ölkənin suverenliyini qorumaq gücündə qalmasının vacibliyini vurğulayıblar. Eyni zamanda bildirilib ki, Rusiya ilə hər hansı potensial danışıqlar yalnız hazırkı təmas xətti əsasında başlaya bilər və Kiyev üçün strateji əhəmiyyət daşıyan təhlükəsizlik təminatları danışıqların ayrılmaz hissəsi olmalıdır.

Avropa paytaxtlarında hesab edilir ki, amerikalı və rusiyalı rəsmilər tərəfindən formalaşdırılan əsas təkliflər Ukraynanın suverenliyi, ərazi bütövlüyü və müdafiə potensialı baxımından ciddi boşluqlar yaradır. Bu səbəbdən həm Kiyev, həm də onun əsas Avropa tərəfdaşları planın bir sıra maddələrini qəbuledilməz sayaraq rədd ediblər.

Qərb diplomatik mənbələri qeyd edirlər ki, Zelenski, Mers, Makron və Starmer arasında koordinasiya Ukraynanın mövqeyinin gücləndirilməsi və sülh danışıqları üçün açıq, lakin sərt şərtlər çərçivəsinin müəyyənləşdirilməsi məqsədi daşıyır. Danışıqlar perspektivinə baxmayaraq, Avropanın əsas gücləri Ukraynanın müdafiə qabiliyyətinin zəiflədilməsi ehtimalını istisna edir.

Poliqon.info