NATO Avropa üzrə qoşunların hərəkət vaxtını 15 dəfə artırmağı planlaşdırır

Poliqon xəbər verir ki, Financial Times qəzetinin məlumatına görə, NATO ölkələri Avropanın qərb hissəsindən şərq cinahına – Rusiya sərhədinə doğru qoşun və hərbi texnika daşınmasının sürətini kəskin şəkildə artırmağı planlaşdırır. Mövcud 45 günlük müddətin cəmi 3 günə endirilməsi nəzərdə tutulur ki, bu da 15 dəfə sürətlənmə deməkdir.

Hazırkı logistika imkanları isə bu məqsədə çatmağa imkan vermir. Qəzet yazır ki, Avropada həm dəmir yolu xəttləri, həm də avtomobil yolları böyük həcmli ağır texnikanın sürətli şəkildə daşınması üçün tələb olunan standartlara uyğun deyil. NATO-nun Şərqi Avropada hərbi hazırlığı gücləndirməsi fonunda, infrastrukturun modernləşdirilməsi məsələsi daha da aktuallaşır.

Məlumata görə, bir sıra ölkələr artıq yolların daşıma qabiliyyətini artırmaq, körpülərin təmirini sürətləndirmək, həmçinin liman və logistika qovşaqlarında buraxılış gücünü genişləndirmək üçün hazırlıq işlərinə başlayıblar. Hərbi analitiklər qeyd edirlər ki, “üçgünlük hədəf” yalnız genişmiqyaslı infrastruktur investisiyaları və üzv ölkələr arasında koordinasiyanın gücləndirilməsi ilə mümkün ola bilər.

Ekspertlərin fikrincə, bu təşəbbüs NATO-nun Rusiya ilə potensial gərginlik ssenarilərinə daha operativ cavab vermək strategiyasının bir hissəsi kimi qiymətləndirilir. Buna baxmayaraq, Avropa daxilində logistik boşluqların aradan qaldırılması xeyli zaman və maliyyə tələb edəcək.

Poliqon.info