Kadırov qardaşı oğlunu Çeçenistan Təhlükəsizlik Şurasının katibi təyin edib

Poliqon xəbər verir ki, Ramzan Kadırov bu barədə iyulun 1-də özünün Telegram kanalında məlumat verib. Kadırovun sözlərinə görə, Qroznıda keçirilən iclasda bunla bağlı təklif verib. Əvvəllər Həmzət Kadırov Çeçenistan rəhbərinin müşaviri-köməkçisi vəzifəsində çalışıb.

“Hörmətli qardaşım oğlu Həmzət Kadırov Çeçenistan Respublikasının Təhlükəsizlik Şurasının katibi vəzifəsinə təyin edilib”, deyə Çeçenistan lideri sosial şəbəkədə yazıb.

Bundan əlavə, Kadırov Çeçenistanın Şalinski rayonunun administrasiyasının rəhbərliyində dəyişikliklər edilməsini təklif etdiyini bildirib. O qeyd edib ki, rayonun yeni başçısı Turpal-Əli İbrahimov olacaq.

Yeni təyinatlardan danışan Çeçenistan Respublikasının başçısı təklif etdiyi şəxslərin rəhbər vəzifələrdə böyük təcrübəyə malik olduğunu diqqətə çatdırıb. Kadırov hesab edir ki, onlara tapşırılan vəzifələrin öhdəsindən gələcəklər.

TASS xəbər verir ki, Həmzət Kadırovun həm mənəvi, həm də dünyəvi təhsili var. O, Tsentaroyevskaya Hafiz Məktəbini və Çeçenistan Dövlət Universitetinin Dövlət İdarəçilik fakültəsini fərqlənmə diplomu ilə bitirib. Ömrünün müxtəlif dövrlərində Çeçenistanda rəhbər vəzifələrdə çalışıb. Belə ki, o, Kurçaloyevski bələdiyyə dairəsi administrasiyasının rəhbəri olub, respublikanın bədən tərbiyəsi və idman naziri vəzifələrində çalışıb, vilayət rəhbərinin katibliyinin rəhbəri və baş nazirin müavini olub.

Xatırladaq ki, Kadırovun öz qohumunu rəhbər vəzifəyə təyin etməsi ilk dəfə deyil. Məsələn, son vaxtlar onun oğulları respublikada yüksək vəzifələr alırlar. Belə ki, may ayında Kadırovun 18 yaşlı oğlu bir neçə ayda ikinci dəfə nazir olub, apreldə isə Çeçenistan rəhbərinin daha bir oğlunun yeni təyinatı barədə məlumat yayılıb.

Poliqon.info