Cənubi Koreya hakimiyyəti Şimali Koreya və Rusiya arasında mümkün hərbi əməkdaşlıqdan dərin narahatdır...
Poliqon xəbər verir ki, bunu Cənubi Koreyanın baş naziri Han Dak Su Şimali Koreya lideri Kim Çen In və Rusiya prezidenti Vladimir Putin arasında dünənki danışıqları şərh edərkən bildirib.
“Biz Rusiya ilə Şimali Koreya arasında münasibətlərin istiləşməsinin şahidiyik. İki ölkə arasında mümkün hərbi əməkdaşlıq barədə xəbərlər həyəcan vericidir”, deyə Cənubi Koreyanın baş naziri Polşada keçirilən forumda çıxışı zamanı bildirib.
Eyni zamanda, Han Dak Su Şimali Koreya və Rusiya liderləri arasında görüşün nəticələri ilə bağlı ətraflı məlumatın verilməsini gözləməyə çağırıb.
O əlavə edib ki, Şimali Koreyanın nüvə raketlərinin mümkün inkişafı təkcə Şərqi Asiya üçün deyil, həm də Avropa üçün təhlükə yaradır, çünki Şimali Koreyanın ballistik raketləri potensial olaraq bütün qitəyə çata bilər.
Sentyabrın 12-də Şimali Koreya lideri Kim Çen In Rusiyaya səfər edib. Sentyabrın 13-də o, “Vostochnıy” kosmodromunda Rusiya prezidenti Vladimir Putinlə görüşüb. Geniş tərkibdə danışıqlar bir saata yaxın davam edib. Sonra Rusiya prezidenti ilə Şimali Koreya liderinin təkbətək söhbəti olub. Danışıqlardan sonra Putin Rusiya ilə Şimali Koreya arasında hərbi-texniki əməkdaşlığın perspektivlərini qeyd edib. Kim Çen Inın Rusiyaya gəlişi fonunda ABŞ Dövlət Departamentinin mətbuat xidmətinin rəhbəri Metyu Miller bildirib ki, Vaşinqton iki ölkə arasında hərbi-texniki əməkdaşlığın inkişafının qarşısını almaq üçün tədbirlər görməyə hazırdır.
Poliqon.info
Populyar xəbərlər
