Pekin Avropa İttifaqına üzv ölkələrdən Tayvan nümayəndələrinə viza verilməməsini və rəsmi təmasların məhdudlaşdırılmasını tələb edir...
Çin Xalq Respublikası Avropa İttifaqı ölkələrinə diplomatik təzyiq göstərərək Tayvandan olan siyasətçilərin əraziyə buraxılmamasını və onlara viza verilməməsini istəyir.
Poliqon xəbər verir ki, bu barədə Böyük Britaniyanın Guardian qəzeti məlumatlı mənbələrə istinadla yazıb.
Məlumata görə, Pekin Aİ-yə üzv dövlətləri Tayvanın “diplomatik pasportlarını” tanımamağa, adanın hazırkı və keçmiş yüksəkvəzifəli şəxslərinin girişinə icazə verməməyə, eyni zamanda onların Avropa qurumları ilə rəsmi təmaslarını ciddi şəkildə məhdudlaşdırmağa çağırır. Qeyd olunur ki, bu tələblər Avropa paytaxtlarına rəsmi notalar və birbaşa diplomatik demarşlar vasitəsilə çatdırılır.
Nəşrin yazdığına görə, Çin hakimiyyəti bu addımlarla Tayvanın beynəlxalq aləmdə siyasi görünürlüğünü azaltmağa və onun Avropa strukturları ilə əlaqələrinin qarşısını almağa çalışır. Mənbələr bildirir ki, məsələ Aİ daxilində narahatlıq doğurur və üzv ölkələr Pekinlə münasibətləri qorumaqla demokratik prinsiplər arasında balans tapmaq məcburiyyətində qalır.
Bundan əvvəl ABŞ prezidenti Donald Tramp bəyan edib ki, Çin sədri Si Cinpin onun prezidentliyi dövründə Tayvana qarşı hərbi əməliyyata başlamağa risk etməyəcək. Trampın bu açıqlaması Vaşinqtonun regiondakı vəziyyəti diqqətlə izlədiyini göstərən siyasi mesaj kimi qiymətləndirilib.
Dekabrın sonlarında isə Çin Müdafiə Nazirliyinin rəsmi nümayəndəsi Can Syaoqan bildirib ki, Pekin Tayvanla “dinc yenidən birləşmə” üçün səylərini davam etdirir, lakin zəruri hallarda digər addımlar atmaq hüququnu özündə saxlayır. Onun sözlərinə görə, Tayvanın müstəqilliyini dəstəkləyən qüvvələr “qırmızı xətti” keçərsə, Çin ordusu “qəti tədbirlər görməkdən” başqa seçimə malik olmayacaq.
Analitiklər hesab edirlər ki, Çinin Avropa İttifaqına yönəlik bu təzyiq siyasəti Tayvan məsələsinin qlobal diplomatik gündəmdə daha da ön plana çıxmasına səbəb ola bilər.
Poliqon.info
Populyar xəbərlər
