Cənubi Koreyada hərbi helikopter qəzaya uğrayıb

Poliqon xəbər verir ki, Cənubi Koreyada təlim uçuşu həyata keçirən AH-1S Cobra tipli hərbi helikopter qəzaya uğrayıb. Yonhap Agentliyinin məlumatına görə, hadisə nəticəsində helikopterin ekipajında olan iki hərbi qulluqçu həlak olub.

Qəza Seuldan təxminən 55 kilometr şimal-şərqdə yerləşən Kapxen (Gapyeong) qəzasında baş verib. 15-ci aviasiya qrupuna məxsus döyüş helikopteri yerli vaxtla saat 09:45-də havaya qalxıb və saat 11:04-də naməlum səbəbdən yerə çırpılıb.

Helikopterdə olan iki hərbçi ağır vəziyyətdə yaxınlıqdakı Poçon və Namyanju şəhərlərinin xəstəxanalarına çatdırılsa da, həkimlərin səylərinə baxmayaraq onların həyatını xilas etmək mümkün olmayıb.

Rəsmi qurumların açıqlamasına əsasən, qəza zamanı yanğın və ya partlayış qeydə alınmayıb, bu da texniki nasazlıq və ya uçuş zamanı yaranmış digər problemlər ehtimalını gündəmə gətirir. Hadisənin dəqiq səbəblərinin müəyyənləşdirilməsi üçün hərbi və mülki mütəxəssislərin iştirakı ilə araşdırmaya başlanılıb.

Qeyd edək ki, AH-1S Cobra helikopterləri Cənubi Koreya ordusunda əsasən taktiki dəstək və təlim məqsədləri üçün istifadə olunur.

Poliqon.info