Brüssel Moskvanın məğlub hesab edilmədiyi halda aktivlərin qaytarıla biləcəyini xatırladır…
Poliqon xəbər verir ki, Belçikanın baş naziri Bart De Vever Avropa Komissiyasının prezidenti Ursula fon der Lyayenə sərt məzmunlu məktub ünvanlayaraq Aİ-nin dondurulmuş Rusiya aktivlərinin müsadirəsi ilə bağlı siyasətini tənqid edib. Politico nəşrinin əldə etdiyi məktubda De Vever xəbərdarlıq edir ki, bu istiqamətdə təcili addımlar Kiyev üçün kompensasiya kreditlərinin verilməsi sxeminin irəli sürülməsi ilə nəticələnə, bununla da Aİ faktiki olaraq Ukrayna üzrə yekun sülh sazişinin əldə olunmasına mane ola bilər.
Belçika baş naziri qeyd edib ki, əgər Rusiya münaqişənin sonunda “rəsmi şəkildə məğlub tərəf elan edilməzsə”, Moskva beynəlxalq hüquqa əsaslanaraq suveren aktivlərinin geri qaytarılmasını tələb etməyə tam haqlı olacaq. Onun sözlərinə görə, aktivlərə qarşı belə addım Aİ maliyyə bazarlarında xaos yarada və hüquqi presedentlər baxımından ciddi risklər formalaşdıra bilər.
Politico yazır ki, məktub Aİ daxilində mövcud olan kəskin fikir ayrılıqlarını daha da aydın şəkildə ortaya qoyur. Xüsusilə Belçika rəsmiləri məsələ ətrafında etirazlarını əvvəldən ifadə edirdilər. Bundan əvvəl ölkənin xarici işlər naziri Maksim Prevo da Avropa İttifaqının Xarici İşlər Şurasında bu plana qarşı qəti etirazını bildirmişdi.
Bundan əlavə, Avropa Komissiyası gələn həftə dondurulmuş Rusiya aktivlərinin Ukraynanın xeyrinə ekspropriasiyasına dair hüquqi təklifini təqdim etməyi planlaşdırır. Bu təklif Aİ daxilində ciddi narazılıqlara baxmayaraq hazırlanıb və onun qəbul olunması ehtimalı hələ də açıq qalır.
Poliqon.info
Populyar xəbərlər
