Reuters: Uitkoff Netanyahuyla danışıqlar üçün İsrailə gedir...

Poliqon xəbər verir ki, ABŞ prezidenti Donald Trampın xüsusi nümayəndəsi Stiven Uitkoff bu həftə İsrailə səfər edəcək. Reuters-in mənbələrə istinadla yaydığı məlumata görə, Uitkoffun İsrailin baş naziri Benyamin Netanyahu, eləcə də ölkənin hərbi-siyasi rəhbərliyi ilə danışıqlar aparması planlaşdırılır.

Mənbələrin bildirdiyinə görə, səfər 3 fevral tarixinə nəzərdə tutulub. Danışıqların əsas mövzularının Yaxın Şərqdə təhlükəsizlik vəziyyəti, Qəzza zolağı ətrafında davam edən gərginlik, həmçinin ABŞ–İsrail strateji əməkdaşlığının gələcək istiqamətləri olacağı gözlənilir. ABŞ administrasiyası regionda eskalasiyanın qarşısının alınması və İsrailin təhlükəsizliyinə dair öhdəliklərini koordinasiya etmək niyyətindədir.

Xatırladaq ki, yanvarın 27-də The Financial Times qəzeti İsrailin ABŞ-la yeni onillik təhlükəsizlik sazişi üzrə danışıqlara hazırlaşdığını yazmışdı. Həmin razılaşmanın məqsədi ABŞ tərəfindən İsrailə göstərilən hərbi və maliyyə dəstəyinin müddətinin uzadılması və həcminin müəyyənləşdirilməsidir. Hazırkı saziş 2028-ci ildə başa çatır və tərəflər artıq indidən onun davamı ilə bağlı məsləhətləşmələr aparır.

Müşahidəçilərin fikrincə, Uitkoffun səfəri Tramp administrasiyasının İsrailə münasibətdə təhlükəsizlik prioritetlərini yenidən təsdiqləmək və regiondakı müttəfiqlərlə koordinasiyanı gücləndirmək cəhdinin bir hissəsidir.

Poliqon.info