Tramp İsrailin İordan çayının qərb sahilini ilhaq etməsinə qarşı çıxıb

Poliqon xəbər verir ki, ABŞ prezidenti Donald Tramp Axios nəşrinə müsahibəsində İsrailin İordan çayının qərb sahilində yerləşən əraziləri ilhaq etməsini dəstəkləmədiyini açıqlayıb. Onun sözlərinə görə, hazırkı mərhələdə ABŞ administrasiyasının diqqətini yönəltməli olduğu kifayət qədər başqa prioritet mövzular var.

“Hazırda düşünməli olduğumuz çoxlu məsələlər mövcuddur. Bizim İordan çayının qərb sahili məsələsi ilə məşğul olmağımıza ehtiyac yoxdur”, Tramp deyib.

Bu açıqlama İsrail hakimiyyətinin İordan çayının qərb sahilində torpaq qeydiyyatı və mülkiyyətin əldə edilməsi qaydalarını dəyişmək qərarından sonra səslənib. Yeni təşəbbüs qeyri-müsəlmanlara bu ərazilərdə torpaq almağa icazə verir, eyni zamanda həmin bölgədə yerləşən daşınmaz əmlakın reyestrinin ictimaiyyət üçün açıq olmasını nəzərdə tutur. Hüquq müdafiəçiləri bu addımı Benyamin Netanyahunun rəhbərlik etdiyi hökumətin Fələstin Muxtariyyətinə məxsus ərazilərin “faktiki ilhaqı” kimi qiymətləndiriblər.

ABŞ rəsmiləri Axios-a bildiriblər ki, Vaşinqton İsrail hökumətinin bu qərarından narahatdır və onun mümkün nəticələrini hələ də araşdırır. Ağ Evin nümayəndəsinin sözlərinə görə, İordan çayının qərb sahilində sabitliyin qorunması İsrailin təhlükəsizliyini təmin edir və mövcud administrasiyanın regionda sülhə nail olmaq məqsədlərinə uyğundur.

Poliqon.info