Rusiya XİN: Brüssel gec-tez İrəvandan anti-Rusiya kursu tələb edəcək...

Poliqon xəbər verir ki, bunu TASS Agentliyinə müsahibəsində Rusiya Xarici İşlər Nazirliyinin Avropa problemləri departamentinin direktoru Vladislav Maslennikov deyib. Onun sözlərinə görə, müəyyən mərhələdə Brüssel istənilən namizəd ölkədən öz xarici siyasət xətti ilə tam solidarlıq tələb etməyə başlayır və hazırkı şəraitdə bu xətt açıq şəkildə anti-Rusiya xarakteri daşıyır. Diplomat Ermənistanın Aİ-yə inteqrasiya planlarını şərh edərək bildirib ki, Brüsselin bütün tələblərinin yerinə yetirilməsi belə, üzvlüyə zəmanət vermir.

Maslennikov qeyd edib ki, Qərbi Balkan ölkələrinin təcrübəsi bunu aydın göstərir: Albaniya 2000-ci ildən, Şimali Makedoniya 2004-cü ildən, Monteneqro 2008-ci ildən, Serbiya isə 2009-cu ildən Aİ-yə üzvlük növbəsindədir. Onun sözlərinə görə, bu ölkələr uzun illərdir avrobürokratiyanın sərt və çox vaxt əhali üçün son dərəcə qeyri-populyar tələblərini yerinə yetirsələr də, hələ də “Avropa arzusu”nun reallaşmasına yaxınlaşmayıblar.

Rusiya XİN rəsmisi əlavə edib ki, Aİ-yə üzvlük, xüsusən də indiki vəziyyəti nəzərə alındıqda, namizəd ölkələr üçün avtomatik rifah demək deyil. O, Baltikyanı ölkələrin nümunəsini xatırladaraq vurğulayıb ki, bu dövlətlər Aİ-də 20 illik üzvlüyü qeyd etsələr də, onların iqtisadi göstəriciləri və demoqrafik vəziyyəti yumşaq desək, gözləntiləri doğrultmur.

Poliqon.info